Андижонда хонадонида қалбаки дори воситалари ишлаб чиқарган шахслар ушланди

Андижонда яшаш хонадонида дори воситаларини ноқонуний ишлаб чиқаришни йўлга қўйган фуқаролар қўлга олинди. Бу ҳақда Божхона қўмитаси хабар берди.

 

Маълум қилинишича, Андижон ва Асака шаҳарлари ҳамда Асака туманида ўтказилган тезкор тадбирларда шубҳа остига олинган 3 нафар шахсларнинг ўзаро келишиб, яшаш хонадонларида дори воситаларини ишлаб чиқаришга мўлжалланган яширин лаборатория ва цехлар ташкил қилгани аниқланди.

 

Хонадонларни кўздан кечириш давомида қалбаки дори воситалари, уларни ишлаб чиқариш учун ускуналар, бўш флаконлар, этикеткалар, йўриқномалар, дори қадоқлашда фойдаланиладиган анжомлар, турли муҳрлар ва бошқа анжомлар топилган.

 

Дастлабки таҳлилларга кўра, қўлбола тарзда дори воситаларини ишлаб чиқаришга мўлжалланган яширин цехлардан қиймати 1 млрд 250 млн сўмлик 4 дона ускуна, 6 дона муҳр, 4 турдаги 214 минг дона бўш флакон ва идишлар,  турли этикетка ва йўриқномалар, уларни қадоқлашга хизмат қилувчи анжомлар ашёвий далил сифатида олинган.

 

Шунингдек, 163 хил турдаги 286 минг 676 дона сифати кафолатланмаган дори воситалари мусодара қилинган.

 

Олиб қўйилган “Тивортин”, “Лайботен”, “Ревартон”, “Дипроспан”, “Рияболел” “Сефазолин”, “Стрептомитцин” “Ампицилин” каби қўлбола дори воситаларининг асл нусхалари қиймати фармацевтика бозорида ўртача 10 млрд. сўмни ташкил қилади.

 

Қайд этилишича, қалбаки маҳсулотлар муомалага кирганида, интеллектуал мулк эгаларига иқтисодий зарар етиб, 200 мингдан ортиқ беморларнинг саломатлигига жиддий хавф туғилар эди.