БМТ Ҳўрмуз бўғозида кемалар хавфсизлиги бўйича махсус гуруҳ тузди
Гуруҳ фаолияти бўғоз орқали ўғитлар ва хомашё ташишни таъминлашга қаратилган.
БМТ бош котиби Антонио Гутерриш Ҳўрмуз бўғозида кемалар қатнови хавфсизлигини таъминлаш бўйича махсус ишчи гуруҳ тузди. Бу ҳақда report.az хабар берди.
Маълум қилинишича, ишчи гуруҳга БМТнинг Лойиҳаларга хизмат кўрсатиш бошқармаси раҳбари Жорж Мориера да Силва раҳбарлик қилади.
“Ушбу ишчи гуруҳнинг устувор вазифаси Ормуз бўғозида гуманитар мақсадларни таъминлаш учун техник механизмларни ишлаб чиқишдан иборат”, — деди БМТ бош котибининг расмий вакили Дюжаррик.
Унинг сўзларига кўра, гуруҳ фаолияти бўғоз орқали ўғитлар ва хомашё ташишни таъминлашга қаратилган.
Қайд этилишича, ташаббусни амалга оширишда БМТнинг аввалги лойиҳалари, жумладан, Қора денгиз дон ташаббуси тажрибаси ҳам инобатга олинади.
Механизм фаолияти аъзо давлатлар билан яқин ҳамкорликда, халқаро ҳуқуқ нормалари ва давлатлар суверенитетига риоя қилган ҳолда олиб борилади.
