Эрон билан уруш бир неча ҳафтада якунланиши мумкин — АҚШ давлат котиби
Марко Рубио икки нафар эронлик амалдор АҚШ билан музокара ўтказишга тайёр эканини билдирган.
АҚШ Сенатори ва юқори лавозимли расмийлардан бири Марко Рубио жума куни G7 давлатлари ташқи ишлар вазирларига Эрон билан уруш яна икки- тўрт ҳафта давом этиши мумкинлигини билдирган. Бу ҳақда бевосита хабардор уч манба Axios нашрига маълум қилган.
Рубио Францияда бўлиб ўтган учрашувда АҚШ Эрон билан жиддий музокараларга яқин эканини таъкидлаган. Шу билан бирга, минтақага қўшимча минглаб қўшинлар юборилаётгани ва маъмурият қуруқликдаги кучларни ҳам ўз ичига олиши мумкин бўлган кескин вариантларини кўриб чиқаётганини билдирган.
Котиб урушдаги барча мақсадларига эришишга қатъий бел боғлаганини айтган. У Г7даги ҳамкасбларига АҚШ Эрон билан ҳозирча бевосита эмас, воситачилар орқали алоқада эканини маълум қилган. Манбаларга кўра, Теҳронда қарорлар ким томонидан қабул қилинаётгани борасида ноаниқлик мавжуд.
Шунингдек, Рубио икки нафар эронлик амалдор АҚШ билан музокара ўтказишга тайёрлигини билдирган, аммо улар юқори раҳбариятнинг розилигини олиши кераклигини қўшимча қилган. Воситачиларнинг хавфсизлик юзасидан телефонлардан фойдаланмаётгани сабабли алоқа жараёни секинлашмоқда.
Рубио АҚШнинг Ҳўрмуз бўғозини қайта очишда G7 мамлакатларининг ёрдамига эҳтиёжи йўқлигини, аммо уруш тугаганидан кейин бўғозни назорат қилиш учун иттифоқчилари денгиз кучларига қўшилишини исташини таъкидлаган.
“Рубио АҚШга кейинги босқичда кемаларни кузатиш ёки Ҳўрмуз боғозида халқаро иштирокни таъминлаш учун иттифоқчилар керак бўлишини айтди. Бу эронликларга бўғоз устидан назорат уларда эмаслигини кўрсатади. Барчаси бунга рози бўлди”, — деган манба.
G7 учрашувидан кейинги брифингда Рубио уруш “ойлар эмас, балки ҳафталар ичида” якунланишини кутаётганини билдирган. Эҳтимолий тинчлик музокараларида Эрон томондан ким вакиллик қилиши борасида аниқлик кутилмоқда.
Агар музокаралар бўлса, АҚШ делегациясига витсе-президент Жей Ди Вэнс раҳбарлик қилиши мумкин. Шу билан бирга, Доналд Трамп дипломатик жараёнда Марко Рубио, Стив Уиткофф ва Жаред Кушнер иштирок этаётганини айтган.
Рубио урушдан кейин иттифоқчилар Ҳўрмуз боғозида ҳаракатланиш эркинлигини таъминлашда фаолроқ бўлиши лозимлигини, чунки Эрон бу ҳудуддан ўтадиган кемалардан тўлов ундиришни режалаштираётганини билдирган.
