Халқаро қидирувда бўлган икки ўзбекистонлик Туркияда ушланди
Йирик миқдордаги фирибгарликда гумонланаётган шахслар Ўзбекистонга экстрадиция қилинди.
Ўзбекистон ва Туркия ҳуқуқни муҳофаза қилувчи органлари ўртасидаги самарали ҳамкорлик натижасида, йирик миқдорда фирибгарлик жиноятини содир этган ва халқаро қидирувда бўлган хўразмлик 40 ёшли Т.Р. ва Тошкентлик 38 ёшли Ф.А. Туркия ҳудудида аниқланиб қўлга олинган.
Ўзбекистоннинг Истанбулдаги Бош консуллиги маълумотларига кўра, мазкур шахслар Ўзбекистон Ички ишлар вазирлиги ходимлари томонидан белгиланган тартибда қабул қилиниб, суд олдида жавобгарликка тортилиши учун мамлакатга қайтарилган.
Таъкидлаш жоизки, сўнгги йилларда Ўзбекистон ва Туркия ҳуқуқни муҳофаза қилувчи органлари ўртасидаги амалий ҳамкорлик изчил ривожланиб бормоқда. Бу йўналишда жиноятчиликка қарши курашиш, халқаро қидирувда бўлган шахсларни аниқлаш ва уларни жавобгарликка тортиш бўйича самарали натижаларга эришилмоқда.
Ҳозирги кунда ҳам мамлакат ҳудудида турли жиноятлар содир этган, Туркия ҳудудида яширинган бошқа шахсларни аниқлаш ва қўлга олиш бўйича тезкор-қидирув ҳамда ҳуқуқий чоралар давом эттирилмоқда.
