Исроил мусулмон давлатларининг бир-бири билан уришишини хоҳлайди — Туркия ТИВ раҳбари

Туркия ташқи ишлар вазири Ҳакан Фидан ААҚШ ва Исроил халқаро ҳуқуқни бузган ҳолда Эронга қарши бошлаган уруш тобора минтақавий кенгайиш хавфига дуч келаётганини билдирди. Бу ҳақда Фиданнинг A Haber телеканалига берган интервьюсига таяниб, Anadolu хабар берди.

 

Қайд этилишича, Фидан АҚШ ва Исроилнинг Эронга қарши ҳужумлари минтақа ва глобал сиёсатга жуда жиддий таъсир кўрсатаётганини таъкидлаб: "Афсуски, Америка ва Исроил халқаро ҳуқуқни бузган ҳолда бошлаган бу уруш тобора минтақавий кенгайиш хавфига дуч келмоқда", — деб огоҳлантирди.

 

Фидан бошиданоқ уруш бошланишининг олдини олиш, агар шундай бўлса, уни тўхтатиш, тарқалишига йўл қўймаслик ва жараёнга аралашмаслик Туркиянинг мақсади бўлганини айтди. У мамлакат шу мақсад доирасида ҳаракат қилаётганини қўшимча қилди.

 

"Бизнинг асосий мақсадимиз урушни тўхтатишдир. Буни амалга оширишда биз учун урушнинг бошқа мамлакатларга тарқалмаслиги ва минтақада доимий душманлик ва беқарорлик юзага келмаслиги муҳимдир. Умид қиламанки, уруш қачондир, у ёки бу тарзда тугайди"— деди вазир.

 

Ҳакан Фидан урушлардан кейин мамлакатлар ўртасидаги адоват йиллаб давом этиши мумкинлигини ҳам таъкидлади.

 

Шунингдек, вазир минтақа Исроил сценарийси асосида тузилган ўйинга босқичма-босқич жалб қилинаётганини айтиб ўтди.

 

“Ҳозирги нуқтага етиб келганимизда, Эронга қарши уруш олиб борилаётган бир пайтда, афсуски, минтақада Исроил томонидан низо уруғи сепилаётганини кўрмоқдамиз, бу эса минтақадаги мусулмонларнинг яна бирлашишини деярли имконсиз қилади. Бошқача қилиб айтганда, Туркиянинг бош мақсади бу низонинг пайдо бўлишининг олдини олишдир”.

 

У, Исроил ва АҚШнинг ҳужумларининг минтақадаги баъзи давлатлар учун хавф туғдирганини, 7-8 давлатга Эрон ракеталари ва дрон ҳужумлари амалга оширилганини қайд этди ва маслаҳат сифатида сабрли бўлиш, ортиқча реакция кўрсатмасликни таклиф қилди.

 

"Минтақадаги давлатларнинг ўзаро жавоблари узоқ муддатли оқибатларга олиб келади. Бу айнан Исроил истаган сценарий. Яъни, musulmon давлатлари минтақада бир-бири билан узоқ муддатли можарога киришиши керак. Илтимос, бундай қилманг, бу бизнинг Эронга ҳам, бошқа мамлакатларга ҳам маслаҳатимиз."

 

Фидан, Ар-Риёддаги йиғилишда асосий мавзу Эрон ҳужум қилган давлатлар бўлганини ва Туркиянинг позицияси ҳеч қандай провокацияга йўл қўймаслик эканини таъкидлади.