Покистонда Яқин Шарқдаги вазият бўйича музокаралар ўтказилади
29-30 март кунлари Саудия Арабистони, Туркия ва Миср ташқи ишлар вазирлари Исломободга ташриф буюради.
Покистон якшанба куни Саудия Арабистони, Туркия ва Миср ташқи ишлар вазирларини Яқин Шарқдаги уруш бўйича музокаралар учун қабул қилади. Бу ҳақда Покистон ташқи ишлар вазирлигига таяниб Arab News хабар берди.
Маълумотларга кўра, Саудия Арабистони ташқи ишлар вазири шаҳзода Файсал бин Фархон, Туркия ташқи ишлар вазири Ҳакан Фидан ва Миср ташқи ишлар вазири доктор Бадр Абдуллатти 29-30 март кунлари Покистонлик ҳамкасби Ишоқ Дарнинг таклифига биноан Исломободга ташриф буюради.
Покистон ташқи ишлар вазирлиги баёнотида айтилишича, ташриф давомида ташқи ишлар вазирлари минтақадаги кескинликни юмшатишга қаратилган саъй-ҳаракатлар каби бир қатор масалалар бўйича чуқур муҳокамалар ўтказади.
“Ушбу ташриф Покистоннинг ушбу мамлакатлар билан ўзаро манфаатли кўп қиррали соҳалардаги ҳамкорлиги ва мувофиқлаштиришини янада мустаҳкамлаш учун имконият яратади”, дейилади баёнотда.
Шунингдек, Покистон Бош вазири Шаҳбоз Шариф шанба куни Эрон президенти Мас;уд Пезешкиён билан бир соатлик телефон суҳбати ўтказганини маълум қилди.
“Мен Покистоннинг Исроилнинг Эронга қарши давом этаётган ҳужумларини, жумладан, яқинда фуқаролик инфратузилмасига қилинган ҳужумларни қатъий қоралашини яна бир бор таъкидладим ва Покистоннинг жасур Эрон халқи билан бирдамлигини билдирдим”, деди Шариф ва Пезешкиёнга Покистоннинг тинчлик йўлидаги саъй-ҳаракатларини юқори баҳолагани учун миннатдорчилик билдирганини қўшимча қилди.
Туркия ташқи ишлар вазири Ҳакан Фидан аввалроқ учрашув дастлаб Туркияда режалаштирилганини айтган эди. Кейинроқ Фидан Покистон расмийларининг ўз мамлакатларида қолишлари шарт бўлганлиги сабабли учрашув Покистонга кўчирилганини билдирди.
