Россия 1 апрелдан бошлаб бензин экспортини тўхтатади

Ёнилғи нархларининг ошиб бориши фонида Россия 1 апрелдан бензин экспортини тўхтатади.Бу ҳақда "ТАСС" агентлигига таяниб, DW хабар бермоқда. 

 

Таъкидланишича, қарор ички бозорни барқарорлаштириш ва ёқилғи нархларининг ошишининг олдини олиш мақсадида жорий этилмоқда.

 

Россия Энергетика вазирлиги томонидан тайёрланаётган тегишли қарорга кўра, тақиқ мамлакатнинг барча бозор иштирокчиларига татбиқ этилади. Шу билан бирга, тақиқ Россия ҳукумати бошқа давлатлар билан тузган ҳукуматлараро келишувлар доирасидаги етказиб беришларга ҳамда дизель ёнилғисига татбиқ этилмайди.

 

Ҳукумат матбуот хизмати бу чора “ички бозорни устувор таъминлаш ва бензин нархларини барқарорлаштиришга” хизмат қилишини билдирган.

 

Шунингдек, Энергетика вазирлиги мамлакатдаги нефтни қайта ишлаш ҳажми 2025 йил март ойидаги даражада сақланиб қолишини маълум қилган. Бу эса ички бозордаги нефть маҳсулотлари етказиб берилишини барқарор таъминлашга имкон беради.

 

“Газпром нефть” компанияси раҳбари Александр Дюков Президент Владимир Путин иштирокидаги Россия саноатчилар ва тадбиркорлар иттифоқи йиғилишидабензин экспортини тақиқлаш зарурлигини таъкидлади. Дюковнинг сўзларига кўра, АҚШ ва Исроилнинг Эронга қарши уруши натижасида жаҳон бозорида нефть ва нефть маҳсулотлари нархи кескин ошган. Шу сабабли, ички бозордан бензинни юқори нархларда сотиш имконияти мавжуд бўлган ташқи бозорларга оқиб кетишининг олдини олиш лозим.

 

Бундай тақиқлар Россияда биринчи марта жорий этилаётгани йўқ. Украина билан уруш бошланганидан сўнг ва Россия нефтни қайта ишлаш заводларига ҳужумлар ортидан мамлакат ҳукуматлари бир неча бор шундай чекловлар киритган. Охирги марта бензин экспорти бўйича чекловлар 2026 йил январь ойида юмшатилган эди.

 

Шунингдек, 25 мартга ўтар кечаси Украина Ленинград вилоятидаги Уст-Луга портига зарба берган, бу эса Россиянинг нефть маҳсулотларини экспорт қилиш имкониятларини янада чеклаган. 

 

"Коммерсант" манбасига кўра, ушбу ҳолат яқин вақт ичида мамлакатда нефть қазиб олиш ва қайта ишлаш ҳажмининг камайишига олиб келиши мумкин.

 

Эронга қарши АҚШ ва Исроилнинг ҳарбий ҳаракатлари жаҳон нефть бозорида кескин тебранишларга сабаб бўлмоқда. Уруш натижасида Ҳўрмуз бўғози орқали ҳаракат тўхташи глобал нефть етказиб беришнинг тахминан 20 фоизига таъсир қилган.