Россиянинг Украинага ҳужумлари оқибатида уч киши ҳалок бўлди
Зарбалар оқибатида туғуруқхона томи шикастланган, ходимлар ва беморлар эвакуация қилинган.
28 мартга ўтар кечаси Россия қўшинлари Украинанинг Одесса ва Кривой Рог шаҳарларига дронлар билан ҳужум уюштирди. Оқибатда камида уч киши ҳалок бўлган, яна ўнлаб фуқаролар жароҳатланган.
Одесса шаҳар ҳарбий маъмурияти маълумотига кўра, шаҳар икки марта дронлар билан нишонга олинган. Ҳужумлар натижасида жароҳатланганлардан бири шифохонада вафот этган. Яна камида 11 киши, жумладан бир нафар бола жароҳат олган.
Дастлабки маълумотларга кўра, зарбалар оқибатида туғуруқхона томи шикастланган, Приморский туманида кўп қаватли уйлар зарар кўрган ва ёнғинлар юзага келган. Шунингдек, Ҳажибей туманида ҳам ёнғинлар қайд этилган, Киев туманида эса нотурар жой бинолари шикастланган ва турар жойларда ойналар синган.
Шу билан бирга, Кривой Рог шаҳрига ҳам дронлар билан оммавий ҳужум амалга оширилган.
Днепропетровск вилояти расмийларига кўра, саноат корхонасига зарба берилган. Оқибатда икки киши ҳалок бўлган, яна икки киши жароҳатланган.
Расмийлар ҳодиса юзасидан текширув ишлари давом этаётганини билдирган.
