Швецияда Ўзбекистоннинг экстремизмга қарши кураш тажрибаси юқори баҳоланди

Жорий йилнинг 24–25 март кунлари Швеция парламенти – Риксдагда “Ўзбекистонда диний бағ‘рикенглик, экстремизмга қарши кураш ва террористик гуруҳларнинг собиқ аъзоларини реинтеграция қилиш тажрибаси” мавзусида халқаро семинар бўлиб ўтди, деб хабар бермоқда “Дунё” АА.

 

Ушбу нуфузли тадбирда Ўзбекистон мусулмонлари идораси раиси, муфтий Шайх Нуриддин Холиқназар, Дин ишлари бўйича қўмита раиси биринчи ўринбосари Давронбек Маҳсудов, Яҳудийлар диний жамоаси раиси Аркадий Исахаров, Немис лютеран черкови раиси Людмила Шмидт, Олий Мажлис депутати Дилором Фозиева ҳамда таниқли диншунос экспертлардан иборат делегация Стокголмга ташриф буюрди.

 

Семинарда Риксдаг депутатлари, Шветсия ҳукумати аъзолари, сиёсий ва эксперт доиралари, ҳуқуқни муҳофаза қилиш идоралари, диний жамоалар ва ОАВ вакиллари, Стокголмда аккредитациядан ўтган хорижий давлатлар элчилари – жами 120 дан ортиқ иштирокчи қатнашди.

 

Ўзбекистон делегацияси томонидан мамлакатимизда сўнгги йилларда диний соҳада амалга оширилаётган туб ислоҳотлар, виждон эркинлиги ва бағ‘рикенглик муҳитини мустаҳкамлаш борасидаги тизимли чора-тадбирларнинг самарали натижалари тақдим этилди. Жумладан, “Меҳр” операцияси орқали низоли ҳудудлардан қайтарилган Д.Н. ўз чиқишида Ўзбекистонда адашган шахсларга нисбатан қўлланилаётган кечиримлилик ва жаҳолатга қарши маърифат билан кураш сиёсатининг амалий моҳиятини очиб берди.

 

Швеция расмийлари ва халқаро экспертлар Ўзбекистон тажрибасини юқори баҳолади. Риксдагнинг “Швеция – Марказий Осиё” дўстлик гуруҳи раҳбари, таниқли сиёсатчи Бйорн Содер Ўзбекистоннинг экстремизмга қарши курашдаги илғор тажрибасини ўрганиш икки давлат манфаатларига мос эканини таъкидлади. Швеция ТИВнинг динлараро мулоқот бўйича махсус вакили, элчи Кристиан Камил “Меҳр” операцияларини радикаллашув илдизига берилган кучли зарба деб атаб, Ўзбекистон тажрибаси динлараро мулоқот хавфсизликнинг энг мустаҳкам пояси эканини исботлаганини қайд этди.

 

Швеция хавфсизлик ва тараққиёт сиёсати институти директори, сиёсатшунос Свантe Корнелл Ўзбекистоннинг мусулмон дунёси тарихидаги ўрни ва Президент Шавкат Мирзиёев ташаббуси билан очилган Ислом цивилизацияси марказининг аҳамиятига тўхталиб, радикаллашувга қарши маънавий ва ижтимоий усуллар билан курашиш самарадорлигини алоҳида эътироф этди.

 

Семинар якунида томонлар бу каби очиқ мулоқотлар Ўзбекистон ва Швеция ўртасидаги ўзаро ишончни мустаҳкамлаш ҳамда узоқ муддатли ҳамкорликни янги босқичга олиб чиқишда муҳим қадам бўлишини таъкидлади.