Сирдарёлик йигит вирус дастур орқали фуқароларнинг банк карталаридан пул ўғирлагани аниқланди
У Теlegram орқали зарарли дастур тарқатиб, 200 дан ортиқ фуқаронинг пулини ўзлаштирган.
Telegram мессенжери орқали зарарли иловаларни тарқатиб, фуқароларнинг банк карталаридан пул ечиб олган шахс қўлга олинди. Бу ҳақда ИИВ хабар берди.
Маълум қилинишича, ички ишлар органларига Кармана туманида яшовчи фуқаро мурожаат қилиб, турмуш ўртоғига тегишли банк пластик картасидан 22 миллион сўм маблағ номаълум тарзда ечиб олинганини билдирган. Ҳолат юзасидан тезкор-қидирув ишлари олиб борилган.
Аниқланишича, жиноятга алоқадор шахс 2004 йилда туғилган Сирдарё вилояти фуқароси бўлиб, у Paynet тўлов тизими орқали гўёки доимий даромад топиш мумкинлиги ҳақида ёлғон маълумотлар тарқатган. Шу йўл билан у турли ҳудудларда яшовчи тўққиз нафар фуқарони якка тартибдаги тадбиркор сифатида рўйхатдан ўтказишга ундаган ва уларнинг аккаунтларидан фойдаланган.
Шунингдек, гумонланувчи Telegram мессенжери орқали APK форматидаги зарарли иловаларни тарқатиб, фуқароларнинг мобил қурилмаларини вирус билан зарарлаган. Натижада у ушбу қурилмаларга уланган банк карталаридан пул маблағларини ечиб олган ҳамда ҳар бир транзаксиядан 5–7 фоиз миқдорида улуш олиб турган.
Тезкор тадбирлар давомида Навоий вилояти Ички ишлар бошқармасининг ахборот технологиялари соҳасидаги жиноятларга қарши курашиш бўлими ходимлари томонидан ушбу шахс қўлга олинди. Ҳозирга қадар у томонидан содир этилган 121 та кибержиноят аниқланган.
Маълумотларга кўра, гумонланувчи жами 211 нафар фуқарога тегишли банк карталаридан 2 миллиард сўмдан ортиқ маблағни ноқонуний равишда ўзлаштирган ва бу пулларни шахсий эҳтиёжлари учун сарфлаб юборган.
Мазкур ҳолат юзасидан Жиноят кодексининг 169-моддаси 3-қисми “б” банди билан жиноят иши қўзғатилган. Гумонланувчига нисбатан қамоққа олиш тарзидаги эҳтиёт чораси қўлланилган, дастлабки тергов ҳаракатлари давом этмоқда.
