Тошкентда 100 дан ортиқ дарахт ноқонуний кўчириб ўтказилгани аниқланди
Табиатга 881 миллион 268 минг сўм миқдорида зарар етказилгани маълум бўлди.
Тошкент шаҳри, Шайхонтоҳур тумани, "Юнона" МФЙ, Абу Али ибн Сино кўчаси ҳудудида 108 туп дарахт ноқонуний кўчириб ўтказилгани юзасидан ўрганиш ишлари олиб борилди. Бу ҳақда Экология ва иқлим ўзгариши миллий қўмитаси хабар берди.
Маълум қилинишича, ўрганиш давомида 107 туп дарахт, яъни 12 туп можжевелник (арча) ҳамда 95 туп Элдор қарағайи қуриб қолганлиги аниқланди.
Хабарга кўра, бу дарахтларни кўчириш юзасидан Тошкент шаҳар экология бош бошқармасига мурожаат қилинган ва бошқарма томонидан рад жавоби берилган. Шунга қарамасдан дарахтлар ноқонуний тарзда кўчириб ўтқазилган.
Ҳуқуқбузарлик натижасида, Ўзбекистон Республикаси Вазирлар Маҳкамасининг 2022 йил 22 ноябрдаги “Давлат ўрмон фондига кирмайдиган дарахтлар ва буталарни экиш, парвариш қилиш ва улардан фойдаланиш тартибини янада такомиллаштириш тўғрисида”ги 464-сон қарорига кўра, табиатга 881 миллион 268 минг сўм миқдорида зарар етказилганлиги маълум бўлди.
Ҳолат юзасидан тўпланган ҳужжатлар ҳуқуқни муҳофаза қилувчи органларга тақдим этиш учун тайёрланмоқда.
