Тошкентда Кичик ҳалқа йўли вақтинча ёпилади
28 мартдан 31 мартгача Кичик ҳалқа йўлининг Чилонзор тумани ҳудудидан ўтувчи бир томонлама қисмида ҳаракат чекланади.
Тошкент шаҳридаги Кичик ҳалқа автомобиль йўлида таъмирлаш ишларининг иккинчи босқичи бошланиши муносабати билан айрим ҳудудларда транспорт ҳаракати вақтинча чекланади. Бу ҳақда Тошкент шаҳрида Йўл ҳаракатини ташкил этиш маркази хабар берди.
Расмий маълумотларга кўра, йўл инфратузилмасини модернизация қилиш доирасида фрезалаш, асфалтлаш ҳамда муҳандислик тармоқларини янгилаш ишлари олиб борилади.
Хусусан, 2026 йил 28 март соат 08:00 дан 31 март соат 06:00 гача Кичик ҳалқа йўлининг Чилонзор тумани ҳудудидан ўтувчи бир томонлама қисмида — Лутфий кўчаси кесишмасидан Асрлар садоси кўчаси кесишмасигача бўлган йўналишда ҳаракат чекланади.
Маълум қилинишича, мазкур даврда ушбу йўналиш бўйлаб қатновчи автобуслар ҳамда бошқа транспорт воситалари ҳаракати муқобил йўналишлар орқали ташкил этилади.
Мутасаддилар юзага келиши мумкин бўлган ноқулайликлар учун узр сўраб, ҳайдовчиларга ҳаракат йўналишларини олдиндан режалаштиришни тавсия этмоқда.
