Тошкентда МИБ орқали уй ўз эгасига олиб берилди
Маълум бўлишича, фуқаро уйни бошқа одамга сотган бўлсада, унда яшаб келган.
Суд ҳужжатига кўра, қарздор фуқаро С.С. ва бошқалар ундирувчи T.С.гa мулк ҳуқуқи асосида тегишли бўлган Янгиҳаёт тумани, Машъал МФЙда жойлашган уй-жойдан бошқа турар жой бермасдан мажбурий тартибда кўчирилиши белгиланган.
Аниқланишича, фуқаролар ўртасида қарз муносабати юзага келган бўлиб, қарздор фуқаро муайян миқдордаги пул маблағини олиш мақсадида ўз уйини таниши номига нотариал тартибда расмийлаштириб берган. Қарз шартномасида олинган маблағни 12 ой ичида қайтариш белгиланган.
Бироқ белгиланган муддатда қарз маблағи қайтарилмаган. Шундан сўнг пул берган шахс мазкур уйни бошқа шахсга сотган. Шу билан бирга, уй сотилганига қарамасдан қарздор фуқаро ушбу хонадонда яшашни давом эттирган.
Уйни сотиб олган учинчи шахс мазкур ҳолатдаги қарз муносабатларидан бехабар бўлган ҳолда судга мурожаат қилган ва суд томонидан уй-жойни унга топшириш ҳақида қарор қабул қилинган.
Мазкур ижро ҳужжати Бюронинг Янгиҳаёт туман бўлими иш юритувига 2026 йил 12 февраль куни келиб тушган. Қарздорга ижро иши юритиш қўзғатилгани ҳақида қарор юборилган.
Бироқ суд ҳужжати талаблари ихтиёрий равишда бажарилмаганлиги сабабли давлат ижрочиси Ш.Аҳмадбекова томонидан мажбурий ижро ҳаракатлари амалга оширилди.
Натижада жорий йилнинг 13 март куни мазкур хонадондан қарздор ва бошқалар белгиланган тартибда чиқарилиб, уй-жой қонуний эгасига топширилди.
