Ўзбекистонда чиқинди тўплаш майдончаларидан чиқиндиларни ноқонуний олиб чиқишга жавобгарлик белгиланди
Атроф-муҳит мониторинги маълумотларини нотўғри киритганлик учун юридик шахсларга жарима қўлланилади, айрим ҳолларда маъмурий жавобгарликка тортилади.
25 март куни қабул қилинган қонун билан айрим қонун ҳужжатларига ўзгартириш ва қўшимчалар киритилди.
Киритилган қўшимчаларга кўра, айрим фаолият турлари билан шуғулланувчи юридик шахсларга атроф-муҳитни ифлослантирувчи манбаларнинг мониторингини юритиш бўйича қўшимча мажбуриятлар юклатилди.
Қонунга мувофиқ атроф-муҳит давлат мониторинги тизимининг ягона геоахборот маълумотлар базасига маълумотларни киритмаганлик, тўлиқ киритмаганлик ёки нотўғри маълумот киритганлик учун атроф-муҳитга таъсир кўрсатишнинг I ва II тоифаларига мансуб фаолият турлари билан шуғулланувчи юридик шахсларга БҲМнинг 100 бараваридан 300 бараваригача жарима қўлланилади.
Шунингдек, қонунга хилоф равишда ўрмон фонди ерларини бериш, улардан фойдаланиш, шундай қилмишлар учун маъмурий жазо қўлланилганидан кейин содир этилган бўлса, БҲМнинг 300 бараваридан 400 бараваригача жарима ёки 2 йилдан 3 йилгача озодликни чеклаш ёхуд 3 йилгача озодликдан маҳрум қилиш билан жазоланиши белгиланди.
Бундан ташқари махсус автоматлаштирилган фото- ва видео қайд этиш дастурий-техник воситалари орқали аниқланган экологик ҳуқуқбузарликлар ҳамда чиқиндилар тўплаш майдончаларидан ва уларнинг қўриқланмайдиган иншоотларидан чиқиндиларни қонунга хилоф равишда тўплаганлик ва олиб чиқиб кетганлик учун маъмурий жавобгарлик белгиланади.
