Ўзбекистонда сув танқислигининг олдини олиш бўйича 2026-йилги дастур тасдиқланди

Ўзбекистон ҳукуматининг ирригация тизимларида сув ресурсларидан оқилона фойдаланиш ҳамда сув танқислигининг олдини олишга қаратилган 2026 йилга мўлжалланган қарори қабул қилинди.

 

Қарорга мувофиқ, Сув хўжалиги вазирлигига ажратилган маблағлар ҳисобидан сув билан барқарор таъминланмаган ҳудудларда қишлоқ хўжалиги экинларини сувни тежайдиган технологиялар орқали суғориш учун сув ҳовузлари қуриш ишларига 60 миллиард сўм йўналтирилади. 

 

Шунингдек, сув танқислигини юмшатиш бўйича қўшимча чора-тадбирларга яна 60 миллиард сўм ажратилади.

 

Ҳужжат билан 2026 йилда амалга ошириладиган каналларни бетонлаштириш ва реконструкция қилиш лойиҳалари, сув ҳовузлари қуриш бўйича манзилли рўйхатлар ҳамда сув танқислигининг олдини олишга қаратилган чора-тадбирлар дастури тасдиқланган.

 

Қарорга кўра, мазкур лойиҳалар вазирлик тизимидаги ҳудудий “Сувқурилишинвест” давлат муассасалари буюртмачилигида амалга оширилади. Лойиҳаолди ҳужжатлари уч кун ичида тайёрланиб, ўн кун муддатда лойиҳа ташкилотлари аниқланади. Кейинги босқичда икки ой ичида лойиҳа-смета ҳужжатлари ишлаб чиқилиб, экспертиза хулосалари олинади.

 

Экспертиза хулосалари олинган объектларда уч ҳафта ичида бош пудратчилар аниқланиб, қурилиш-монтаж ишлари бошланади.

 

Шунингдек, ҳудудларда сув ҳовузлари қуриш учун ер участкаларини ажратиш чоралари кўрилади. Бунда қишлоқ хўжалигига мўлжалланган лалми ва бўз ерлардан 2 гектаргача майдон ажратилиши белгиланган.

 

Бетонлаштириш ишларини самарали ташкил этиш мақсадида каналларда сув очиш ва ёпиш бўйича режа-графиклар тасдиқланади ҳамда пудрат ташкилотлари учун зарур иш фронти яратилади.

 

Бундан ташқари, Экология, атроф-муҳитни муҳофаза қилиш ва иқлим ўзгариши миллий қўмитаси тизимидаги ташкилотлар томонидан бериладиган рухсатномалар асосида лойиҳалар доирасида каналлар қирғоқларидаги ўрмон фондига кирмайдиган дарахт ва буталарни кўчириш, зарур ҳолларда кесиш ишлари белгиланган тўловлардан озод этилади.