АҚШда Трампга қарши намойишлар авж олди
“Қироллар йўқ” шиори остидаги намойишлар Нью-Йорк, Вашингтон ва Лос-Анжелес каби йирик шаҳарларда ўтказилган.
АҚШнинг бир қатор йирик шаҳарларида президент Доналд Трамп сиёсатига қарши оммавий норозилик намойишлари бўлиб ўтмоқда. Намойишлар “Қироллар йўқ” (“No Kings”) шиори остида ташкил этилган.
Ташкилотчилар намойишлар орқали Трамп маъмуриятининг айрим сиёсий қарорларига, жумладан, Эрон билан боғлиқ ҳарбий сиёсатга, иммиграция қонунчилигининг кескинлаштирилишига ҳамда мамлакатда яшаш харажатларининг ошишига қарши эканликларини билдирган.
Намойишлар АҚШнинг кўплаб шаҳарларида, жумладан Нью-Йорк шаҳри, Вашингтон ва Лос-Анжелесда ўтказилган. Пойтахт Вашингтон марказида минглаб намойишчилар юриш қилиб, Линкольн мемориали яқинида тўпланиб, Миллий савдо маркази ҳудудини тўлдирган.
Намойиш давомида айрим намойишчилар Трамп ва унинг маъмурияти вакилларининг рамзий тасвирларини кўтариб чиқиб, уларнинг истеъфосини талаб қилган.
Миннесота штатида ҳам йирик намойишлардан бири ўтказилган. Маҳаллий фаоллар бу воқеаларни иммиграция сиёсати билан боғлиқ можаро ва бир қатор фожеали ҳодисаларга нисбатан норозилик сифатида баҳоламоқда.
