Австрияда 20 ёшли футболчи қиз ЙТҲ оқибатида ҳалок бўлди
У бошқариб кетаётган автомобил юк машинаси билан тўқнашган.
Австрияда ёш футболчи Александра Виммер йўл-транспорт ҳодисаси оқибатида ҳалок бўлди. Бу ҳақда унинг Blau-Vays Lins клуби матбуот хизмати маълум қилди.
Маълумотларга кўра, ҳодиса Линц шаҳридаги Mona Lisa тоннелида содир бўлган. Автомобилни бошқариб кетаётган Виммер юк машинаси билан тўқнашиб кетган. Транспорт воситасида бўлган 15 ёшли йўловчи турли жароҳатлар билан шифохонага олиб кетилган. Футболчи эса ҳодиса жойида вафот этган.
Клуб раҳбарияти ва жамоа аъзолари ёш спортчининг вафоти муносабати билан чуқур қайғу билдирди.
Сўнгги бор Виммер Юқори Австрия академияси жамоаси сафида Вена ёшлар жамоасига (U-20) қарши майдонга тушган эди. Мазкур учрашув 2:2 ҳисобидаги дуранг билан якунланган.
