БАА Эрон фуқаролари учун яшаш рухсатномаларини бекор қилди — ОАВ
Шунингдек, БАА Эроннинг юзлаб миллиард долларлик активларини блоклагани ҳақида ҳам хабарлар тарқалди.
Оммавий ахборот воситаларида тарқалган хабарларга кўра, Бирлашган Араб Амирликлари барча Эрон фуқаролари учун берилган яшаш рухсатномаларини бекор қилган. Бу ҳақда Tehran Times нашри маълум қилган.
Манбага кўра, мазкур қарор минтақада кескинлашиб бораётган ҳарбий-сиёсий вазият фонида қабул қилинган бўлиб, у “олтин виза” дастури орқали берилган рухсатномаларни ҳам ўз ичига олади. Шунингдек, нашрда БАА томонидан Эроннинг қарийб 530 миллиард доллар миқдоридаги активлари блоклангани ҳам қайд этилган.
Бироқ ҳозирча ушбу маълумотлар Амирликлар расмийлари томонидан расман тасдиқланмаган.
Сўнгги ҳафталарда Эрон ва АҚШ–Исроил иттифоқи ўртасидаги кескинлик кучайиб бормоқда. Хусусан, 26 март куни Абу-Дабида уриб туширилган дрон парчалари қулаб тушиши оқибатида икки киши ҳалок бўлгани, уч киши жароҳат олгани хабар қилинган.
Эслатиб ўтамиз, 28 февраль куни АҚШ ва Исроил томонидан Эронга қарши ҳарбий операция бошланганидан сўнг, Теҳрон Исроилга ҳамда Яқин Шарқдаги АҚШ ҳарбий объектларига, жумладан БААдаги базаларга ракета ва дрон ҳужумларини амалга оширмоқда.
