Чеченистонда кучли ёғингарчилик сабаб фавқулодда ҳолат эълон қилинди
Табиий офат оқибатларини бартараф этиш учун 300 дан ортиқ қутқарувчи жалб этилган.
Чеченистонда кучли ёғингарчилик ва дарёларда сув сатҳининг кескин кўтарилиши сабаб фавқулодда ҳолат эълон қилинди. Тегишли қарорни республика раҳбари Рамзан Қодиров имзолаган.
Маҳаллий расмий манбаларга кўра, кучли ёмғир ҳамда айрим ҳудудларда ёмғир ва қор кўринишидаги ёғингарчиликлар оқибатида бир қатор ҳудудларда сув тошқинлари хавфи юзага келган. Фавқулодда вазият ҳудудига Грозний ва Аргун шаҳар округлари ҳамда Гудермес, Ножай-Юрт, Шали, Урус-Мартан, Курчалой, Ведено, Итум-Кале, Шарой ва Шатой туманлари киритилган.
Маълумотларга кўра, 29 март куни Гудермес туманидаги Кундухово қишлоғидан 500 нафар фуқаро, жумладан 190 нафар вояга етмаган бола эвакуация қилинган. Айрим ҳудудларда транспорт ҳаракати вақтинча чекланган. Хусусан, Аргун ва Гудермес шаҳарларидаги кўприкларга шикаст етгани сабабли йўллар вақтинча ёпилган.
Табиий офат оқибатларини бартараф этиш ишлари учун 301 нафар қутқарувчи ҳамда 66 та махсус техника жалб этилган.
Кучли ёғингарчилик Кавказ минтақасининг бошқа ҳудудларига ҳам таъсир кўрсатган. Хусусан, Махачқала шаҳрида ҳам фавқулодда ҳолат жорий этилиб, юзлаб аҳоли хавфсиз ҳудудларга кўчирилган.
