Эронда ҳарбий хизмат учун энг қуйи ёш чегараси 12 ёшга туширилди
Болалар разведка, патруллик ва Басиж назорат пунктларидаги хизматларга жалб қилиниши мумкин.
Эронда ҳарбий хизматга жалб этиш бўйича энг қуйи ёш чегараси 12 ёшгача туширилгани маълум қилинди. Бу ҳақда Ислом инқилоби қўриқчилари корпуси (IRGC) раиси ўринбосари Раҳим Надалий баёнот берди, деб хабар қилмоқда Al Arabiya.
Маълумотларга кўра, расмийлар 12–13 ёшли ўсмирларни ихтиёрий равишда ҳарбий хизматга қўшилишга чақирмоқда. Телеканал хабарига кўра, ушбу ёшдаги болалар разведка фаолияти, тезкор патруллик, шунингдек Басиж назорат-ўтказиш пунктларида хизмат қилиш каби вазифаларга жалб қилиниши мумкин.
Бундан ташқари, улар ҳарбий қисмлар учун озиқ-овқат тайёрлаш, ярадор аскарларни парваришлаш ва бошқа ёрдамчи хизматларда ҳам иштирок этиши режалаштирилган.
Хабарда таъкидланишича, мактаб ўқувчиларини ҳарбий хизматга жалб қилиш ташаббуси “Эронликлар учун” деб номланган дастур доирасида амалга оширилмоқда.
Al Arabiya маълумотига кўра, бундай қарор Эроннинг болаларни ҳарбий амалиётларда қўллашни чеклаш бўйича халқаро мажбуриятларига зид бўлиши мумкин.
