Шимолий Корея АҚШга етиб бориши мумкин бўлган ракета двигателини синовдан ўтказди

Шимолий Корея АҚШ ҳудудигача етиб боришга қодир бўлиши мумкин бўлган қитъалараро баллистик ракеталарда қўлланадиган янги қаттиқ ёқилғили ракета двигателининг ер усти синовини ўтказди. Бу ҳақда халқаро ахборот агентлиги Associated Press (AP) хабар берди.

 

Маълумотларга кўра, синов жараёнини Шимолий Корея етакчиси Ким Чен Ин шахсан кузатган. Корея Марказий Ахборот Агентлиги (KCNA) ушбу синов мамлакатнинг беш йиллик мудофаа ривожлантириш дастури доирасида стратегик қуролларни янада такомиллаштириш йўлидаги муҳим босқич эканини таъкидлаган.

 

Хабарларга кўра, янги углерод композит материаллардан тайёрланган двигател максимал 2500 киловатт тортиш кучини ишлаб чиқаради. Бу кўрсаткич 2024 йил сентябр ойида синовдан ўтказилган шунга ўхшаш қаттиқ ёқилғили двигателнинг (1970 киловатт) қувватидан анча юқори экани айтилмоқда.

 

Бироқ Жанубий Кореядаги айрим мутахассислар двигателнинг ишлаш вақти каби асосий техник кўрсаткичлар очиқланмагани сабабли Пхенян томонидан билдирилган самарадорлик ҳақидаги даъволар бўрттирилган бўлиши мумкинлигини қайд этмоқда.

 

Associated Press қайд этишича, сўнгги йилларда Шимолий Корея бир неча бор қитъалараро баллистик ракеталарни синовдан ўтказган ва бу ракеталар АҚШнинг континентал ҳудудига етиб бориш имкониятига эга экани таъкидланган. Қаттиқ ёқилғили ракеталар эса суюқ ёқилғили тизимларга қараганда тезроқ учирилиши ва олдиндан аниқлаш қийинлиги билан ажралиб туради.