Тошкентда пойга уюштирган икки ҳайдовчи 10 суткага қамалди
27 ва 21 ёшли ҳайдовчилар Lacetti ҳамда Onix’da пойга уюштиргани аниқланган.
Тошкентда йўл қатнов қисмида пойга уюштириб, жамоат тартибини бузган икки нафар ҳайдовчи маъмурий жавобгарликка тортилди. Бу ҳақда Йўл ҳаракати хавфсизлиги бош бошқармаси ахборот хизмати раҳбари Зоир Йўлдошев маълум қилди.
Маълум қилинишича, 27 март куни соат 03:40 атрофида пойтахтнинг Олмазор тумани кўчаларидан бирида Lacetti ва Onix русумли автомобилларда пойга уюштирилаётгани, йўл ҳаракати қоидалари ҳамда жамоат тартиби бузилаётгани юзасидан хабар келиб тушган.
Ички ишлар органлари ходимлари томонидан ҳудуддаги кузатув камералари ёзувлари ва воқеа гувоҳларининг кўрсатмалари ўрганилиб, суриштирув ишлари олиб борилган. Натижада ҳуқуқбузарликни 27 ёшли Рамз Исломов ҳамда 21 ёшли Азимжон Абдусатторов содир этгани аниқланган.
Мазкур автомобиллар жарима майдонига жойлаштирилиб, ҳуқуқбузарларга нисбатан тегишли ҳужжатлар судга тақдим этилган. Жиноят ишлари бўйича Олмазор туман судининг қарорига кўра, ҳар икки ҳайдовчига нисбатан 10 суткадан маъмурий қамоқ жазоси тайинланди.
Ҳайдовчилар ўз қилмишидан пушаймон эканини билдириб, фуқаролардан узр сўраган. ЙҲХБ вакиллари ушбу ҳолатдан жабрланган фуқаролар бўлса, ички ишлар органларига мурожаат қилишларини сўраган.
