АҚШ айрим чет элликлар учун бошпана аризаларини кўриб чиқишни қисман қайта бошлайди
Чекловлар Африка, Осиё ва Лотин Америкасидаги 39 та мамлакат фуқароларига татбиқ этилган бўлиб, уларнинг АҚШга кириши тўлиқ ёки қисман чекланган эди.
CBS News манбаларга таяниб хабар беришича, АҚШ расмийлари чет эл фуқаролари томонидан берилган бошпана аризаларини кўриб чиқиш жараёнини қисман қайта тиклашни режалаштирмоқда. Ушбу жараён 2025 йил ноябрь ойида Вашингтон марказида мигрант томонидан Миллий гвардия аскарларига уюштирилган ҳужумдан сўнг тўхтатилган эди. Ҳужум натижасида гумондор ва икки нафар Миллий гвардия аскари жароҳат олган, кейинчалик улардан бири олган жароҳатлари оқибатида вафот этган. DHS котиби Кристи Ноэм гумондор 2021 йилда Афғонистондан АҚШга олиб келинган шахс бўлганини маълум қилган.
Маълумотларга кўра, АҚШ Фуқаролик ва иммиграция хизматлари (USCIS) қарори асосида паст хавфли мамлакатлардан келган, текширувдан ўтган бошпана изловчиларнинг аризаларини кўриб чиқишга қўйилган чекловни қисман бекор қилган.
Ички хавфсизлик департаменти (DHS) вакилларининг таъкидлашича, чекловлар Африка, Осиё ва Лотин Америкасидаги 39 та мамлакат фуқароларига татбиқ этилган бўлиб, уларнинг АҚШга кириши тўлиқ ёки қисман чекланган эди.
Департаментга кўра, қоидаларнинг юмшатилиши мавжуд ресурсларни “юқори хавфли” ҳолатларни янада синчковлик билан текширишга йўналтириш имконини беради. Шу билан бирга, ҳар бир чет эл фуқаросининг шахсини ва хавфсизлик жиҳатларини тўлиқ текшириш амалиёти сақлаб қолинади.
