Австралия ёнилғи солиғини икки баравар камайтиради

Австралия ҳукумати глобал энергетика инқирози кучайиб бораётган бир пайтда бензин ва дизель ёқилғисига қўйиладиган акциз солиғини вақтинча икки баравар камайтиришини эълон қилди. Бу ҳақда Al Jazeera хабар берди.

 

Мамлакат бош вазири Антони Албанезининг маълум қилишича, мазкур чоралар 1 апрелдан 30 июнгача амал қилади ва энергия нархларининг ошиши туфайли аҳолига тушаётган молиявий босимни юмшатишга қаратилган.

 

Вазирга кўра, солиқнинг камайтирилиши бензин нархини ҳар литр учун 26,3 Австралия центи (0,18 доллар)га арзонлаштиради ва 65 литрли бакни тўлдиришда ҳайдовчиларга қарийб 19 Австралия доллари (13 АҚШ доллари) тежаш имконини беради.

 

Қарор хом нефть нархи бир баррель учун 116 доллардан ошиб, сўнгги икки ҳафтадаги энг юқори даражага чиққан пайтда қабул қилинди. Нархларнинг кескин ошишига АҚШ ва Исроилнинг Эронга қарши уруши фонидаги кескинлик сабаб бўлаётгани қайд этилмоқда.

 

Бош вазирнинг таъкидлашича, ҳукумат оғир юк транспорт воситалари учун тўловларни ҳам уч ойга тўхтатади.

 

Шу билан бирга, Австралия қайта ишланган ёнилғининг қарийб 80 фоизини импорт қилиши боис глобал бозор тебранишлари мамлакатга сезиларли таъсир ўтказмоқда.

 

Рақобатни назорат қилувчи орган маълумотларига кўра, март ойининг охирига келиб мамлакатнинг йирик шаҳарларида дизель нархи 10 фоизга, бензин эса 8 фоизга ошган.

 

Австралия Миллий автомобиль йўллари ва ҳайдовчилар ассоциацияси вакили Петер Хоурй эса солиқ имтиёзи ёнилғи нархларининг умумий ўсишини сезиларли даражада қопламаслигини билдирди. Унинг фикрича, асосий босим солиқдан эмас, балки жаҳон бозорида нефть нархларининг ошишидан келиб чиқмоқда.

 

Энергетика вазири Крис Бовен эса мамлакатда ваҳимали харидлар оқибатида 500 дан ортиқ ёнилғи қуйиш шохобчаларида айрим турдаги ёнилғи тугаб қолганини маълум қилган. Шу билан бирга, у Австралиянинг энергия таъминоти барқарорлигини сақлаб қолаётганини ва захираларда 39 кунлик бензин ҳамда қарийб 30 кунлик дизель ва авиация ёнилғиси мавжудлигини билдирган.