Эрон АҚШнинг разведка самолётига зарба берди
Шикастланган Boeing E-3 Sentry AWACS самолётини янги Boeing E-7 Wedgetail билан алмаштириш 700 миллион долларга тушиши мумкин.
Эроннинг Саудия Арабистонидаги авиабазасига амалга оширилган ҳужуми натижасида, Америка ҳарбийлари Boeing E-3 Sentry AWACS разведка самолёти жиддий зарар кўрган бўлиши мумкин. Бу ҳақда BBC хабар берди.
BBC маълумотларига кўра, интернетда тарқалган ва текширилган спутник суратларида E-3 Sentry самолётининг жиддий шикастлангани, ҳатто иккига бўлингандай кўрингани акс эттирилган. Суратлар Ар-Риёддан тахминан 100 км жануби-шарқда жойлашган “Шаҳзода Султон” авиабазасида олингани аниқланган.
Таҳлилчилар суратлардаги объектлар — устунлар, омборлар ва майдон белгилари — спутник тасвирлари билан тўлиқ мос келганини таъкидлаган.
Ҳозирга қадар АҚШ Марказий қўмондонлиги ҳолат юзасидан расмий баёнот бермаган.
Эроннинг Fars агентлиги эса, E-3 самолётига Shahed дрони зарба берганини хабар қилган. BBC эса 11 март куни олинган спутник тасвирларида авиабазада E-3 самолёти қайд этилганини маълум қилган, аммо бу айнан шу самолёт эканлиги ҳозирча аниқ эмас.
E-3 AWACS самолёти Boeing 707 асосида ишлаб чиқилган бўлиб, орқа қисмидаги айланувчи радар орқали узоқ масофадаги нишонларни аниқлаш имконини беради. У 270 миллион доллардан- 300 миллион долларгача баҳоланади.У ҳарбий операцияларда эрта огоҳлантириш ва ҳаво жангида назоратни таъминлашда муҳим аҳамиятга эга.
The Wall Street маълумотига кўра, шикастланган Boeing E-3 Sentry (АWАCС) самолётини янги Boeing E-7 Wedgetail билан алмаштириш 700 миллион долларга тушиши мумкин.
