Эрон Ҳурмуз бўғози орқали юк ташиш учун тўлов жорий этишни режалаштирмоқда
Ҳозирча транзит учун аниқ миқдордаги тўлов эълон қилинмаган.
Теҳрон Ҳурмуз бўғози орқали транзит юк ташиш учун тўлов жорий этилишини эълон қилди. Бу ҳақда Эрон парламентининг Миллий хавфсизлик қўмитаси аъзоси Алаэддин Боружерди маълум қилган.
Унинг сўзларига кўра, парламент томонидан тегишли қонун лойиҳаси қабул қилингач, мазкур сув йўли орқали ўтиш янги тизим асосида бошқарилади. Қонун лойиҳасида кемалар хавфсизлиги ва уларга хизмат кўрсатиш харажатлари транзит учун олинадиган тўловлар орқали қопланиши назарда тутилган.
Ҳозирча транзит учун аниқ миқдордаги тўлов эълон қилинмаган.
Аввалроқ халқаро денгиз нашри Lloyd’s List 20 март куни Эрон Ҳурмуз бўғози орқали транзит учун бож жорий этгани ҳақида хабар берган эди. Нашр маълумотига кўра, тасдиқланган ташувчилар учун “хавфсиз йўлак” ташкил этилган бўлиб, айрим операторлар транзит учун тахминан 2 миллион доллар тўлаган.
Шунингдек, Эрон кемаларни рўйхатдан ўтказиш орқали расмий транзитни тасдиқлаш тизимини жорий этишни режалаштираётгани қайд этилган.
Мутахассислар таъкидлашича, Ҳурмуз бўғози глобал энергетика савдосида муҳим стратегик аҳамиятга эга. Ҳарбий кескинликлар бошланишидан аввал дунёдаги нефть ва нефть маҳсулотларининг 15–20 фоизи, шунингдек суюлтирилган табиий газнинг 30 фоиздан ортиғи айнан шу сув йўли орқали ташилган.
