Италияда машҳур рассомларнинг миллионлаб евролик асарлари ўғирланди
Жиноятчилар асарларни уч дақиқа ичида олиб қочишган.
Италияда Парма яқинидаги Маняни-Рокка жамғармасининг хусусий музейидан учта машҳур рассомнинг асарлари ўғирланди. Бу ҳақда AFP агентлигига таяниб Deutsche Welle хабар берди.
Қайд этилишича, жиноят 22 мартдан 23 мартга ўтар кечаси содир бўлган. Ўғирланган асарлар орасида Пер Огуст Ренуарнинг “Балиқлар”, Пол Сезанннинг қалам ва акварель билан ишланган “Гилосли табиат манзараси” ҳамда Анри Матисснинг акварель “Терассадаги одалиска” асарлари мавжуд.
Полиция маълумотларига кўра, ўғрилар тўртта бўлган. Ниқобли жиноятчилар кириш эшигини бузиб, биринчи қаватдаги заллардан бирига киришган ва дурдона асарлар билан музей боғи орқали қочиб кетишган. Бутун операция уч дақиқадан кам давом этган.
Маняни-Рокка жамғармаси ходимлари ҳодисани олдиндан режалаштирилган жиноят деб атаб, уни кенгайишидан видеокузатув тизими ҳамда полиция ва хавфсизлик ходимларининг тезкор аралашуви тўхтатганини билдирган. Ўғирланган асарларнинг тахминий қиймати миллионлаб евроларга баҳоланган, тергов ишлари давом этмоқда.
Маняни-Рокка жамғармаси хусусий музейи танқидчи ва коллекционер Луижи Маняни номи билан аталган бўлиб, унда Титсиан, Дюрер, Рубенс ва Гоя каби санъат усталарининг асарлари сақланади. Музей Италиядаги энг муҳим санъат коллекцияларидан бири ҳисобланади.
Санъат оламида сўнгги ойларда бошқа йирик жиноятлар ҳам содир бўлган. 2025 йил 19-октабрда Париждаги Луврдан Франция монархларининг тахминан 88 млн евро қийматдаги қимматбаҳо буюмлари ўғирланган эди.
