Трамп Эрон электр станцияларини ва нефть қудуқларини вайрон қилиш билан таҳдид қилди
АҚШ президенти агар музокаралар муваффақиятсиз якунланса, Харг оролини вайрон қилишини таъкидлади.
АҚШ президенти Доналд Трамп Яқин Шарқдаги урушни тугатиш бўйича музокаралар муваффақиятсиз якунланса, Эрондаги барча электр станциялари, нефть қудуқлари ва Харг оролини йўқ қилиш билан таҳдид қилди. Бу ҳақда Трамп Truth Socialдаги баёнотида маълум қилган.
Президентнинг таъкидлашича, Вашингтон Эрон билан "янги ва оқилона режим билан жиддий музокаралар" олиб бормоқда, аммо музокара томонларини аниқ кўрсатмаган. Трамп шунингдек, Ҳормуз бўғозининг “иш учун очиқ” бўлмаслиги ҳолатида, Эроннинг энергетика инфратузилмаси ва Харг оролидаги муҳим объектларини портлатиб, транспорт қатновини бутунлай тўхтатишга тайёр эканлигини билдирган.
Маълумотларга кўра, Эрон нефтининг тахминан 90 фоизи Харг ороли орқали экспорт қилинади. Axios нашрининг хабарига кўра, Трамп маъмурияти оролни эгаллаш ёки денгиз блокадасини жорий этиш режасини ишлаб чиқмоқда. Оқ уй манбаси таъкидлашича, бундай операцияни бошлашдан олдин Ҳормуз бўғозидаги Эрон ҳарбий имкониятларини заифлаштириш учун тахминан бир ой керак бўлади.
