Трамп Кубага Россия нефть танкерининг киритилишига рухсат берди
Мазкур танкердаги нефть Кубанинг тахминан икки ярим ҳафталик ёнилғи эҳтиёжини қоплайди.
АҚШ президенти Доналд Трамп Кубага қўйилган нефть блокадаси масаласида позициясини ўзгартириб, Россия танкерининг мамлакатга кириб келишига рухсат беришга тайёр эканини билдирди. Бу ҳақда Reuters хабар берди.
Якшанба куни Трамп ҳар қандай давлат, жумладан Россиянинг Кубага хом нефть етказиб беришига “ҳеч қандай эътирози йўқлигини” айтди. Бу баёнот Россиянинг санкциялар остидаги танкери Куба портига яқинлашиб келаётган бир пайтда берилди.
Маълумотларга кўра, Россиянинг “соя флоти”га кирувчи санксияланган кема якшанба куни Куба шарқий қирғоқлари яқинида бўлган ва душанба куни портга етиб бориши кутилган. Ушбу юк АҚШ томонидан амалда жорий этилган нефть блокадаси шароитида иқтисодиёти деярли издан чиққан Куба учун муҳим ёрдам ҳисобланади.
АҚШ 3 январь куни Венесуэла президенти Николас Мадуро ҳокимиятдан ағдарилгач, Венесуэладан Кубага нефть экспортини тўхтатган. Шунингдек, Трамп Кубага нефть етказиб берувчи бошқа давлатларга ҳам кескин тарифлар жорий этиш билан таҳдид қилган. Натижада Кубанинг асосий етказиб берувчиларидан бири бўлган Мексика ҳам экспортни тўхтатган.
Куба президенти Мигел Диас-Канелнинг маълум қилишича, мамлакат уч ой давомида бирорта ҳам нефть танкери қабул қилмаган. Бу эса 10 миллион аҳолига эга давлатда бензин танқислиги, қатъий тақсимот (ратионлаш) ва кенг кўламли электр узилишларига олиб келган. Куба соғлиқни сақлаш расмийлари бу инқироз, айниқса болалар орасидаги саратон беморлари учун ўлим хавфини оширганини билдирган.
Air Force One бортида журналистларга мурожаат қилган Трамп кубаликларнинг энергияга бўлган эҳтиёжини тушунишини айтиб, бундай ёрдам Гаванадаги коммунистик ҳукуматга фойда келтиришидан хавотирда эмаслигини таъкидлади. Унинг фикрича, бу ҳукумат барибир тез орада қулайди.
“Куба тугаган. У ердаги бошқарув режими ёмон, раҳбарият коррупцияга ботган. Кубага битта танкер нефть келадими-йўқми, бу вазиятни ўзгартирмайди. Мен эса нефть киритилишига рухсат беришни афзал кўраман, чунки одамлар иситиш, совитиш ва бошқа зарур эҳтиёжлар учун энергияга муҳтож,” — дея қўшимча қилди Трамп.
Шу билан бирга, у Куба ҳукуматига нисбатан кескин баёнотларини давом эттириб, Эрон билан боғлиқ вазият ҳал қилингач, АҚШ қирғоқларидан атиги 150 км узоқликда жойлашган ушбу давлатга кўпроқ эътибор қаратишини айтди.
Март ойининг бошида АҚШ глобал нефть оқимини яхшилаш мақсадида Россияга нисбатан айрим санкцияларни вақтинча юмшатган эди. Бу чоралар АҚШ ва Исроилнинг Эрон билан уруши фонида чекланган таъминотни тиклашга қаратилган. Бироқ мазкур истиснолар Куба, Эрон, Шимолий Корея ва Қрим билан боғлиқ операцияларни аниқ тақиқлаган.
“Анатолий Колодкин” танкери Россиянинг Приморск портидан тахминан 650 минг баррель (айрим манбаларга кўра 730 минг баррель) хом нефть ортиб йўлга чиққан.
Куба расмий нашри Cubadebate ушбу етказиб беришни АҚШ нефть блокадасига очиқдан-очиқ қаршилик сифатида баҳолаган. Хабарларга кўра, Россия ҳарбий-денгиз кучлари санксияланган кемани Ла-Манш бўғози орқали Кариб денгизи томон кузатиб борган.
The New York Times нашрининг ёзишича, АҚШ Соҳил қўриқлаш хизмати кеманинг Кубага етиб боришига тўсқинлик қилмаган, бироқ бу қарорнинг сабаби очиқланмаган. Танкерни куч билан тўхтатиш эса ҳозирги мураккаб геосиёсий вазиятда Россия билан тўқнашув хавфини ошириши мумкин эди.
Таҳлилчиларга кўра, мазкур танкер Кубанинг тахминан икки ярим ҳафталик нефть эҳтиёжини қоплайди, бироқ қатъий тақсимот шароитида бу муддатни бир ойгача узайтириш мумкин.
