Ўзбекистоннинг бир қатор ҳудудларида гиёҳванд моддалар савдосининг олди олинди
Гумонланувчилар кучли таъсир қилувчи моддаларни турли дори воситалари идишларида яширин ҳолда олиб кирган.
Хоразм, Фарғона ва Тошкент вилоятларида гиёҳвандлик воситалари ҳамда кучли таъсир қилувчи моддаларнинг ноқонуний айланмасининг олди олинди. Бу ДХХ маълум қилди.
Қайд этилишича, Хоразм вилоятининг Урганч шаҳрида ўтказилган тезкор тадбир давомида 1983 йилда туғилган шахснинг ёнидан 5 грамм “опий” моддаси аниқланган. Шунингдек, у ижарага олган хонадондан 887 грамм “опий” ва 71 грамм “героин” мусодара қилинган. Тергов маълумотларига кўра, мазкур шахс ушбу моддаларни қўшни давлатдан олиб келиб, келгусида сотишни режалаштирган.
Фарғона вилоятидаги ҳолатда эса 1991 йилда туғилган фуқаронинг яшаш хонадонидан Қирғизистондан ноқонуний олиб кирилган 2800 дона “Регапен” дори воситаси аниқланган. Уларнинг умумий қиймати 140 миллион сўмга баҳоланган.
Тошкент вилоятида қайд этилган яна бир ҳолатда 1996 йилда туғилган шахс ва унинг таниши — 1994 йилда туғилган Қозоғистон фуқароси 300 миллилитр “Тропикамид” моддасини 300 АҚШ доллари ва 600 минг сўмга сотиш вақтида қўлга олинган. Улардан шунингдек “Прегабалин” капсулалари ва “Тропикамид” сақланган флаконлар ҳам мусодара қилинган.
Маълум бўлишича, гумонланувчилар кучли таъсир қилувчи моддаларни мамлакат ҳудудига турли дори воситалари идишларида яширин ҳолда олиб кирган.
Ҳозирда мазкур ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
