1 апрелдан Ҳиндистонга кириш учун электрон келиш картаси талаб қилинади
Қоғоз шаклидаги келиш карталаридан фойдаланиш тўлиқ бекор қилинади.
Ҳиндистонга саёҳат қилишни режалаштираётган хорижий фуқаролар учун кириш тартибида муҳим ўзгариш жорий этилди. 2026 йил 1 апрелдан бошлаб мамлакатга киришда қоғоз шаклидаги келиш карталаридан фойдаланиш тўлиқ бекор қилинади.
Янги қоидаларга мувофиқ, барча хорижий саёҳатчилар мамлакатга келишдан аввал электрон келиш картасини расмийлаштириши шарт бўлади. Ариза келишдан камида 72 соат олдин онлайн тарзда тўлдирилиши керак.
Мазкур жараён Su-Swagatam мобил иловаси ёки Ҳиндистоннинг расмий виза хизмати портали орқали амалга оширилади.
Аввал қоғоз ва электрон шакллар биргаликда қўлланилган ўтиш даври 31 март куни якунланади. 1 апрелдан бошлаб эса мамлакат чегарасидан ўтиш учун электрон тасдиқланган келиш картаси мажбурий ҳисобланади.
Мутахассисларнинг таъкидлашича, янги тизим паспорт назорати жараёнини тезлаштириш, аэропортларда юзага келадиган навбатларни камайтириш ҳамда миграция жараёнларини рақамлаштиришга хизмат қилади.
