Қачондир тугатаман, лекин ҳозир эмас — Трамп
АҚШ президенти Эронга қарши ҳарбий операцияни ҳозир тугатишга тайёр эмаслигини билдирди.
АҚШ президенти Доналд Трамп CBS News телеканалига берган интервьюсида Эронга қарши Америка ҳарбий операциясининг ҳозирги босқичини тугатишга ва Ҳормуз бўғозида нормал юк ташиш шароитларини тиклашга тайёр эмаслигини маълум қилди. Президентнинг сўзларига кўра, бу жараён “қачондир амалга оширилади, лекин ҳозир эмас”. Президент CBS телеканалига берган интервьюсида бошқа давлатлар ҳам вазиятни ҳал қилишда фаол роль ўйнаши кераклигини таъкидлаган.
Аввалроқ The Wall Street Journal маълумотларига кўра, Трамп ёрдамчиларига Ҳормуз бўғози асосан кемалар учун ёпиқ бўлиб қолса ҳам, Эронга қарши кампанияни тўхтатишини айтган.
“Қачондир мен буни қиламан, лекин ҳозир эмас. Бошқа давлатлар ҳам рўл ўйнаши ва ўз ишларини бажариши керак. Эрон вайрон бўлган, аммо мамлакатлар олдинга чиқиб ишларини бажаришлари зарур”, деди Трамп. Шунингдек, у Ҳормуз бўғозида жиддий таҳдидлар мавжуд эмаслигини, вазиятни назорат остида сақлаш мумкинлигини қайд этди.
The Wall Street Journal хабарига кўра, Трампнинг фикрича, Қўшма Штатлар Эроннинг денгиз ва ракета кучларини чеклаш, амалдаги ҳарбий операцияларни назорат қилиш ҳамда Теҳронга дипломатик босим ўтказиш орқали эркин савдони тиклаш каби асосий мақсадларига эришиши лозим. Агар бу чоралардан самара олинмаса, Вашингтон Европа ва Форс кўрфази иттифоқчиларидан Ҳормуз бўғозини очиш ташаббусини олишини талаб қилади.
