Эрондан Туркияга яна баллистик ракета учирилди

Туркия Мудофаа вазирлиги 30 март куни Эрондан учирилган баллистик ракета мамлакат ҳаво ҳудудига кириши билан тутиб олинганини маълум қилди.

 

Расмий маълумотларга кўра, бу Яқин Шарқда ҳарбий можаро бошланганидан буён Туркия томон йўналтирилган тўртинчи ракета ҳисобланади. Аввалги ҳолатларда бўлгани каби, барча снарядлар зарарсизлантирилгани қайд этилган.

 

Вазирлик баёнотида таъкидланишича, Эрон томонидан учирилган ва Туркия ҳаво ҳудудига киргани аниқланган баллистик ўқ-дорилар Ўрта Ер денгизининг шарқий қисмида жойлаштирилган НАТО ҳаво ва ракетага қарши мудофаа кучлари томонидан йўқ қилинган.

 

НАТО вакили Аллисон Ҳарт ҳам ушбу маълумотни тасдиқлаб, альянснинг навбатдаги таҳдидни бартараф этганини билдирди.

 

“30 март куни НАТО яна Эроннинг Туркияга йўл олган баллистик ракетасини муваффақиятли уриб туширди. Альянс таҳдидларга доим тайёр ва барча иттифоқчиларни ҳимоя қилиш учун зарур чораларни кўради”, — деди у.

 

Аввалроқ Туркия президенти Ражаб Тоййиб Эрдўған мамлакат ҳарбий можарога тортилишдан қочишини билдирган эди. Эроннинг Туркиядаги элчихонаси эса учирилган тўртта ракета ортида Теҳрон турганини рад этиб, воқеаларни ўрганиш учун қўшма тергов гуруҳи тузишни таклиф қилган.

 

Эрон илк бор 4 март куни Туркия томон ракета учиргани, у Ироқ ва Сурия ҳаво ҳудуди орқали мамлакатга киргани хабар қилинганди. Ўшанда ҳам НАТО тизими ракетани уриб туширган.

 

9 март куни иккинчи ракета Туркия ҳаво ҳудудига кирган пайтда йўқ қилинган, унинг парчалари Газиантеп шаҳри яқинига тушган, қурбонлар қайд этилмаган.

 

13 март куни учинчи бор учирилган баллистик ракета ҳам НАТО ҳаво ҳужумидан мудофаа тизими томонидан уриб туширилган.

 

Туркия расмийлари мамлакат “яхши қўшничилик” тамойилларига амал қилишини ва минтақадаги барқарорликни қўллаб-қувватлашини таъкидлаб, шу билан бирга ҳудудига қаратилган ҳар қандай таҳдидга нисбатан зарур чоралар кўрилишини маълум қилган.