Қирғизистон ўз миллий валютасини илк бор мамлакат ичида чоп эта бошлади
Аввал қирғиз банкноталари Буюк Британия ва Франциядаги компаниялар томонидан чоп этилган.
Садир Жапаров Бишкекда янги босмахона ишга туширилганини эълон қилди. Шу тариқа Қирғизистон ўз тарихида биринчи марта миллий валютаси — сўмни мамлакат ҳудудида мустақил равишда чоп эта бошлади.
Давлат раҳбарининг таъкидлашича, аввал банкноталар ишлаб чиқариш жараёни чет элдаги ихтисослашган компанияларга топширилган. Хусусан, қирғиз сўми узоқ йиллар давомида Британиянинг De La Rue ҳамда Франциянинг Oberthur Fiduciaire каби халқаро компаниялар томонидан чоп этилган. Бу эса давлат бюджетидан қўшимча маблағлар сарфланишига сабаб бўлган.
Президентнинг маълум қилишича, янги босмахона банкноталар ишлаб чиқаришда зарур бўлган барча сифат ва хавфсизлик талаблари бўйича халқаро сертификатни қўлга киритган. Шу сабабли мамлакат эндиликда нафақат ўз миллий валютасини ишлаб чиқаради, балки бошқа давлатлардан ҳам буюртмалар қабул қилиш имкониятига эга.
Шунингдек, Қирғизистонда давлат ҳужжатларини тайёрлаш тизими ҳам ривожланган. Жумладан, умумфуқаролик паспортлари, шахсни тасдиқловчи ҳужжатлар, ҳайдовчилик гувоҳномалари ҳамда транспорт воситаларини рўйхатдан ўтказиш ҳужжатларини ишлаб чиқариш жараёни ҳам йўлга қўйилган.
Садир Жапаровнинг таъкидлашича, ишлаб чиқарилаётган маҳсулотлар юқори даражадаги ҳимоя элементлари билан таъминланган бўлиб, улар халқаро стандартларга мос келади ва қалбакилаштиришни деярли. Шу билан бирга, маҳаллий ишлаб чиқариш туфайли харажатлар камайиши ҳам кутилмоқда.
