Испания Эрон билан урушда иштирок этаётган АҚШ самолётлари учун ҳаво ҳудудини ёпди
Испания ҳукумати бу қарорни урушга қўшилмаслик сиёсати билан изоҳламоқда.
Испания АҚШнинг Эронга қарши ҳарбий ҳаракатларда иштирок этаётган самолётлари учун ўз ҳаво ҳудудини ёпди. Бу ҳақда мамлакат мудофаа вазири Маргарита Роблес маълум қилди.
Роблеснинг таъкидлашича, ушбу қарор аввал АҚШга қўшма фойдаланишга мўлжалланган ҳарбий базалардан фойдаланишга рухсат берилмагани ортидан қабул қилинган бўлиб, ундан кейинги яна бир чорадир.
“Биз Эрон билан урушга алоқадор ҳаракатлар учун ҳарбий базалардан ҳам ҳаво ҳудудидан фойдаланишга рухсат бермаймиз”, — деди Роблес Мадридда журналистларга.
Испаниянинг El Pais нашри ушбу хабарни ҳарбий манбаларга таяниб биринчи бўлиб эълон қилган.
Нашрга кўра, ҳаво ҳудудининг ёпилиши НАТО аъзоси бўлган Испания орқали Яқин Шарқдаги нишонларга йўл олган ҳарбий самолётларни мамлакат ҳудудини четлаб ўтишга мажбур қилади. Бироқ бу чеклов фавқулодда вазиятларга татбиқ этилмайди.
Испания иқтисодиёт вазири ушбу қарор ҳукуматнинг аввал қабул қилган сиёсатининг давоми эканини билдирди.
“Бу қарор бир томонлама ва халқаро ҳуқуққа зид тарзда бошланган урушда иштирок этмаслик ҳамда унга ҳисса қўшмаслик ҳақидаги қароримизнинг бир қисмидир”, — деди у.
Испания бош вазири Педро Санчез АҚШ ва Исроилнинг Эронга қарши ҳужумларини кескин танқид қилиб, ҳарбий ҳаракатларни ноқонуний деб атаган.
АҚШ президенти Доналд Трамп эса Испания томонидан урушда ўз ҳарбий базаларидан фойдаланишга рухсат берилмагани сабабли Мадрид билан савдо алоқаларини тўхтатиш билан таҳдид қилган.
