Korean Air ёнилғи нархлари ошгани сабаб фавқулодда бошқарув режимига ўтмоқда
Компания ички харажатларни камайтириш орқали иқтисодий барқарорликни таъминлашни режалаштирмоқда.
Korean Air учиш ёқилғиси нархларининг кескин ошиши ва глобал иқтисодий тебранишлар шароитида молиявий барқарорликни сақлаш мақсадида фавқулодда бошқарув режимига ўтганини маълум қилди. Бу ҳақда BBC хабар берди.
Қайд этилишича, бу қарор АҚШ-Исроил ва Эрон ўртасидаги давом этаётган урушнинг глобал иқтисодиётга таъсири фонида қабул қилинди.
Миллий авиакомпания вакили сешанба куни билдиришича, компания ички харажатларни камайтириш чораларини жорий қилади ва бу орқали ёнилғи нархлари ошиши ва глобал иқтисодий тебранишлар шароитида барқарорликни таъминлашни режалаштирмоқда.
Сўнгги маълумотларга кўра, 28 февралдан бошлаб нефть нархи 50 фоиздан ортиқ ошган, авиация ёнилғиси нархи эса икки баравар кўтарилган. Бу вазият авиакомпанияларни ўз бизнесларини ҳимоя қилиш учун фавқулодда чоралар жорий этишга мажбур қилмоқда.
PwC Сингапур консалтинг компанияси вакили Тан Чи Сиангнинг айтишича, авиакомпаниялар COVID-19 пандемияси каби инқирозларда шунга ўхшаш фавқулодда чораларни қўллаган. Айниқса Осиё авиакомпаниялари глобал нефть нархларининг ошиши ва минтақавий авиация ёнилғиси етишмовчилиги туфайли ҳар томонлама зарар кўрмоқда ва шу сабабли чоралар кўришга мажбур бўлмоқда.
Korean Air ушбу чоралар орқали нафақат молиявий барқарорликни сақлаш, балки ёқилғи нархлари ва глобал иқтисодий беқарорликнинг салбий таъсирини юмшатишни мақсад қилган.
