Россия ҳам тайёр бўлса Украина ўт очишни тўлиқ тўхтатади — Зеленский

Украина президенти Володимир Зеленский мамлакат ҳар қандай муддатда ўт очишни тўлиқ тўхтатишга тайёр эканини маълум қилди. Зеленский бу ҳақда ўзининг Telegram-каналида ёзиб, Россия билан эҳтимолий сулҳ масаласига тўхталди.

 

Унинг таъкидлашича, Украина Россияга қарши зарбаларни ташаббус сифатида эмас, балки жавоб чораси сифатида амалга оширмоқда. Зеленский, шунингдек, глобал энергетика инқирози фонида айрим ҳамкор давлатлардан Россиянинг нефть ва энергетика секторига қарши ҳужумларни камайтириш бўйича сигналлар олинганини қайд этди.

 

“Яна бир бор таъкидлайман: агар Россия Украина энергетикасига зарба бермасликка тайёр бўлса, биз уларнинг энергетикасига жавоб қайтармаймиз”, — деди у.

 

Зеленскийга кўра, Украина тўлиқ ўт очишни тўхтатиш, энергетик сулҳ ҳамда озиқ-овқат хавфсизлиги бўйича келишув вариантларини илгари сурган ва уларни муҳокама қилишга тайёр.

 

“Биз ҳар қандай ўт очишни тўхтатиш вариантини муҳокама қилишга тайёрмиз. Тўлиқ ўт очишни тўхтатиш, энергетик сулҳ ва озиқ-овқат хавфсизлиги бўйича сулҳ — буларнинг барчасини таклиф қилганмиз ва бунга очиқмиз. Агар россияликлар тайёр бўлса, исталган муддатга таклиф қилинсин, бу масалани ҳал этишга собитмиз”, — дея ёзди у.

 

Шунингдек, у Украина суверенитети ва қадр-қиммати масаласида муроса қилмаслигини таъкидлади.