Россияда айрим ҳуқуқбузарликлар учун чет элликларни депортация қилиш таклиф қилинди
Янги ташаббусга кўра, рухсатсиз митингларда қатнашган ёки экстремистик фаолият билан боғлиқ ҳуқуқбузарлик содир этган чет эл фуқаролари мамлакатдан чиқарилиб юборилиши мумкин.
Россияда айрим ҳуқуқбузарликларни содир этган чет эл фуқаролари ва фуқаролиги бўлмаган шахсларни мамлакатдан чиқариб юборишни назарда тутувчи қонун лойиҳаси Давлат Думасига тақдим этилди. Бу ҳақда ТАСС хабар берди.
Қонун лойиҳасига кўра, Маъмурий ҳуқуқбузарликлар тўғрисидаги кодексга тегишли ўзгартиришлар киритилиши режалаштирилмоқда. Унга мувофиқ, агар ҳуқуқбузарлик чет эл фуқароси томонидан содир этилган бўлса, маъмурий жарималар билан бир қаторда Россия ҳудудидан маъмурий депортация чораси қўлланиши мумкин.
Таклиф этилаётган нормаларга биноан, рухсатсиз митингларда қатнашиш, Россия Қуролли Кучларини обрўсизлантириш, Россия ва унинг фуқароларига қарши санкциялар жорий этишга чақириш ҳамда мамлакат ҳудудий яхлитлигига қарши чиқиш каби ҳаракатлар учун чет эл фуқароларини мамлакатдан чиқариб юбориш мумкин бўлади.
Бундан ташқари, фавқулодда ҳолат, аксилтеррор операцияси ёки ҳарбий ҳолат талабларини бузиш, рухсат этилмаган жойларда отишма қилиш, транспорт ҳаракатига тўсқинлик қилиш, ҳуқуқни муҳофаза қилувчи органлар талабларига бўйсунмаслик ва майда безорилик каби ҳуқуқбузарликлар ҳам маъмурий депортация учун асос бўлиши мумкин.
Қонун лойиҳасида экстремизм ва бузғунчи ахборот билан боғлиқ ҳуқуқбузарликлар учун ҳам қатъий чоралар назарда тутилган. Хусусан, диний рамзларни таҳқирлаш, нафрат ва адоват қўзғатиш, экстремистик ёки нацистик рамзларни тарғиб қилиш, экстремистик материалларни ишлаб чиқариш ва тарқатиш, шунингдек терроризмга чақириқларни тарқатиш каби ҳолатлар учун ҳам чет элликларни депортация қилиш таклиф этилмоқда.
Шу билан бирга, айрим ҳуқуқбузарликлар учун жарималарни ошириш ҳам кўзда тутилган. Бу чоралар Россия чегарасини кесиб ўтиш қоидаларини бузиш, мамлакатга кириш ва унда бўлиш тартибига риоя қилмаслик, чет эл фуқароларининг ноқонуний ишлаши ҳамда мигрантларни ноқонуний ёллаш билан боғлиқ ҳуқуқбузарликларга нисбатан қўлланиши мумкин.
