Сурхондарёда пенсионерлардан иборат наркожиноий гуруҳ фош этилди
Афғонистон фуқароси таъминотчи сифатида бир гуруҳ кексалар билан ўзаро тил бириктириб, гиёҳвандлик моддаларини тарқатиш билан шуғулланиб келган.
Сурхондарё вилоятида уюшган наркожиноий гуруҳ фаолиятига чек қўйилди. Бу ҳақда вилоят Ички ишлар бошқармаси маълум қилди.
Маълумотларга кўра, Афғонистон фуқароси таъминотчи сифатида бир гуруҳ Сурхондарёлик бўлган кекса ёшли фуқаролар билан ўзаро жиноий тил бириктириб, Термиз шаҳри ва тумани ҳудудларида наркокурерлик қилиб, гиёҳвандлик моддаларини тарқатиш билан шуғулланиб келган.
Сурхондарё вилояти Ички ишлар бошқармаси тезкор қидирув хизмати ҳамда Давлат хавфсизлик хизмати ходимлари билан ҳамкорликда ўтказилган тезкор тадбирда гумонланувчилардан бири тўхтатилиб текширилганда, унинг ёнидан опий гиёҳвандлик моддаси борлиги аниқланди. Тадбир давомида ушбу моддаларни етказиб берган яна бир шахс ҳам аниқланиб, ундан махсус тадбир учун берилган пул маблағлари далилий ашё сифатида расмийлаштириб олинди. Давом эттирилган текширувлар натижасида гуруҳнинг яна бир аъзоси ушланди. Унинг ёнидан 5 грамм гиёҳвандлик моддаси аниқланди.
Кейинги босқичда эса ушбу жиноий занжирнинг асосий бўғини фош этилди. Унинг яшаш хонадонидан жами 12 дона қадоқланган 12,42 грамм опий моддалари аниқланди. Xонадонда гиёҳвандлик моддаларини истеъмол қилиш воситалари ҳам борлиги маълум бўлди.
Қайд этилишича, гумонланувчилар ўз айбларини яширишга уринган ҳолда шерикларини ҳам фош қилган.
Ҳозирда ушбу ҳолат юзасидан барча гумонланувчиларга нисбатан Ўзбекистон Республикаси Жиноят кодексининг 276 ва 273-моддалари билан жиноят иши қўзғатилиб, қамоққа олиш эҳтиёт чораси қўлланилган.
