Тошкент халқаро молия маркази ташкил этилади
Марказ ҳудудида конституциявий қонун билан белгиланадиган махсус ҳуқуқий режим жорий этилади.
Ўзбекистонда Тошкент халқаро молия марказини ташкил этиш тўғрисидаги президент фармони қабул қилинди. Бу ҳақда “Ҳуқуқий ахборот” Тelegram-канали хабар берди.
Фармонга мувофиқ, Тошкент халқаро молия маркази ҳамда унинг таркибида Тошкент халқаро тижорат суди ташкил этилади.
Ҳужжатга кўра, марказ ҳудудида молиявий, инвестиция ва банк фаолияти, суғурта, рақамли (крипто) активлар, қимматли қоғозлар, тўлов тизимлари ва хизматлари, исломий ва яшил молия, молиявий технологиялар билан боғлиқ хизматлар кўрсатиш ва транзаксияларни амалга ошириш, аудиторлик, консалтинг ва юридик хизматлар кўрсатишга рухсат берилади.
Фармонга асосан, марказ ҳудудида конституциявий қонун билан белгиланадиган махсус ҳуқуқий режим жорий этилади.
Шу билан бирга, марказ бошқарув органларига фуқаролик, корпоратив, тижорат, молия, банк, солиқ, давлат харидлари, меҳнат ҳуқуқи ҳамда шахсий маълумотларни ҳимоя қилиш соҳаларини тартибга солувчи норматив-ҳуқуқий ҳужжатларни қабул қилиш ваколати берилади.
Шунингдек, марказ ҳудудида Англия ва Уэлснинг умумий ҳуқуқи ҳамда адолат тамойиллари тўғридан-тўғри қўлланилади.
Тошкент халқаро тижорат суди эса биринчи инстанция ва апелляция босқичларидан иборат бўлади.
