Тошкент туманида банкдан қарздор МЧЖнинг фермаси хатланди
Шундан сўнг у гаров мулки сифатида аукционда сотилиб, қарздорлик бартараф этилган.
Мажбурий ижро бюроси Тошкент тумани бўлими иш юритувида Сирдарё туманлараро иқтисодий судининг ижро варақасига асосан қарздор “M.S.TRADE” МЧЖдан ундирувчи “Алоқа банк” фойдасига жами 21.448.728 АҚШ доллари қарздорлик ундириш, ундирувни “M.B.S” МЧЖга тегишли Тошкент тумани, “Қизғалдоқ” ҚФЙ, “Эъзоз” МФЙ, Янгабод кўчасида жойлашган “Чорва фермасига” қаратиш кўрсатилган.
Қарздорга нисбатан ижро ҳужжатини талабини бажариш ва қарздорликни қоплаш юзасидан қонунчиликка мувофиқ 15 кунлик ихтиёрий муддат берилган. Бироқ, бу муддатда ҳам қарздор “M.S.TRADE” МЧЖ банк олдидаги қарз суммасини қопламаганлигидан сўнг, гаровга қўйилган “Чорва фермаси” бино иншоотига қарздорликни қоплаш юзасидан қаратилган.
“Чорва фермаси” электрон онлайн-аукцион савдоларига чиқарилган, аукцион савдоларида гаров мулки 23.800.000.000 миллиард сўмга сотилган. Кўчмас мулкни сотувидан тушган пул маблағлари ундирувчининг қонуний талаблари қаноатлантирилиб, банк ҳисоб рақамларига ўтказиб берилган. Бу эса суд қарорларининг ҳаётда ўз аксини топаётгани, қонун устуворлиги эса амалий ҳаракатлар билан мустаҳкамланаётганини яна бир бор тасдиқлади.
