Тошкентда автобус пиёдалар йўлагидан ўтаётган она-болани туртиб кетди
Мазкур ҳолат юзасидан расмий маълумот берилиб, ҳайдовчи ишдан олинди.
Тошкент шаҳри Сергели туманида пиёдаларга йўл бермасдан уларни туртиб кетган ҳайдовчи ишдан олинди. Бу ҳақда “Тошшаҳартрансхизмат” компанияси хабар берди.
Маълум қилинишича, ҳолат 30 март куни ат тахминан 17:50 ларда 12-автобус саройи филиали тасарруфида бўлган, “Saz Lе 60” русумли, давлат рақами 01| 845 ЗЖА, сарой рақами 039-бўлган, 104-сонли йўналиш бўйлаб ҳаракатланадиган автобус билан содир бўлган.
Ҳайдовчи С.А автобусни Сергели тумани “Янги Сергели” кўчаси бўйлаб бошқариб кетаёган вақтида, пиёдаларнинг ўтиши учун мўлжалланган тартибга солинмаган пиёдалар ўтиш жойидан йўлни кесиб ўтаётган она-болага йўл бермасдан, пиёдаларнинг ҳаётига хавф туғдириб ҳаракатланиши оқибатида пиёданинг қўлида бўлган телефони ва бошқа буюмлари қўлидан тушиб кетиш ҳолати кузатилган.
Ушбу қоидабузарлик ижтимоий тармоқларда кенг тарқалиб, тармоқ фойдаланувчилари орасида норозиликка сабаб бўлди.
Содир этилган ҳолат “Тошшаҳартрансхизмат” АЖ Бошқарув раиси ўринбосари, Ҳаракат хавфсизлигини назорат қилиш бошқармаси, “12-Автобус саройи” раҳбарияти ва масъуллари ҳамда ИИББ ЙҲХБ ходимлари иштирокида танқидий муҳокама қилинган. Ҳайдовчи А.С ишдан олинган.
Шунингдек, мазкур ҳолат Тошкент шаҳар ИИББ ЙҲХБ ходимлари томонидан ўрнатилган тартибда расмийлаштирилган.
