Тошкентда сунъий ёмғир ёғдирилади

Тошкент шаҳри ҳавосини яхшилаш мақсадида, пойтахт ва Тошкент вилоятида сунъий ёмғир ёғдирилади. Бу ҳақда Президентинг ҳаво сифатини яхшилашга оид фармонида белгиланди.

 

Қайд этилишича, Ўзбекистонда сунъий ёмғир ёғдириш ва сунъий шамол технологиясини босқичма-босқич жорий қилиш чоралари кўрилади. Бунинг учун ижобий синовдан ўтган хорижий тажриба ўрганиб чиқилади.

 

Фармонга мувофиқ, Экология қўмитаси, Фанлар академияси ва Олий таълим вазирлигига шундай топшириқ берилди. 

 

Унга кўра, 2027 йил 1 октябрга қадар пойтахтнинг атмосфера ҳавосини яхшилаш мақсадида Тошкент шаҳри ва Тошкент вилоятида намлик паст бўлган ҳудудга сунъий ёмғир ёғдириш учун керакли асбоб-ускуналар ўрнатилади.

 

Мазкур чоралар учун маблағ Умуммиллий экологик муаммоларни бартараф этиш давлат мақсадли жамғармасидан ажратилади.

 

Сунъий ёмғир технологиясини жорий этиш аввалроқ 2026 йилги давлат дастурига ҳам киритилган эди. 

 

Дастурда 2026 йил 1 мартдан бошлаб амалий пилот лойиҳани ишлаб чиқиш, пилот тажрибалар доирасида камида 3–5 та амалий синов ўтказиш, бу орқали ёғингарчилик ўзгариши табиий фонга нисбатан 10–20 фоизга ўсишини таъминлаш кўзда тутилган.