Тошкентдаги Ботаника боғида 1 апрелдан велосипед ва самокатлар ҳаракати тўхтатилади
Боғ маъмурияти бунга ташриф буюрувчиларнинг йиқилиши ва жароҳат олиши билан боғлиқ ҳолатлар кўпайганини сабаб қилиб кўрсатди.
Тошкент Ботаника боғи маъмурияти ташриф буюрувчилар хавфсизлигини таъминлаш мақсадида боғ ҳудудида велосипед ва самокатларда ҳаракатланишни тақиқлаш қарорини эълон қилди.
Боғ маъмурияти хабарига кўра, сўнгги вақтларда боғ ҳудудида велосипед ва самокатларда ҳаракатланиш пайтида фуқароларнинг йиқилиши ва турли даражадаги тан жароҳатлари билан боғлиқ ҳолатлар кўпайган.
Бундан ташқари, ташриф буюрувчилардан ҳам ушбу масала бўйича кўп мурожаат ва таклифлар келиб тушгани қайд этилган.
Шу сабабли, Илмий кенгашнинг қарори ва ташриф буюрувчиларнинг кўп мурожаатлари асосида 2026 йил 1 апрелдан бошлаб Ботаника боғи ҳудудида барча турдаги велосипед ва самокатларда ҳаракатланиш тўхтатилади.
Маъмурият таъкидлашича, ушбу чора боғда хавфсиз, тинч ва осуда пиёда сайр қилиш муҳитини яратиш, табиат гўзаллигидан хотиржам баҳра олиш имконини сақлаш мақсадида амалга оширилмоқда.
Боғ раҳбарияти ташриф буюрувчилардан ушбу тартибга риоя қилиш ва ўзларининг ҳамда атрофдагиларнинг хавфсизлигига эътибор беришни сўради.
