Трамп Ҳўрмуз бўғози очилмаса ҳам Эрон билан урушни якунлашга тайёр — WSJ
Ҳўрмуз бўғозини қайта очиш ҳарбий амалиётни узайтиришни талаб қилиши мумкин.
Трамп ёрдамчиларига агар Ҳўрмуз бўғози очилмаса ҳам АҚШнинг Эронга қарши ҳарбий ҳаракатларни якунлашга тайёрлигини айтган. Бу ҳақда The Wall Street Journal президент маъмурияти вакилларига таяниб, хабар бермоқда.
Манбаларнинг айтишича, сўнгги кунларда Трамп ва унинг маслаҳатчилари Ҳўмуз бўғозини очиш операцияси тўрт-олти ҳафталик муддатдан ошиб кетиши мункин, деган хулосага келган. Хабар қилинишича, президент АҚШнинг асосий мақсадлари амалга оширилишини, яъни Эрон флотини заифлаштириш ва ракета дастурини йўқ қилишни хоҳламоқда.
Нашр Трамп амалдаги ҳарбий ҳаракатларни босқичма-босқич тўхтатишни, бир вақтнинг ўзида эса Теҳронга дипломатик босим ўтказиб, эркин савдони тиклашга эришишни режалаштираётганини ёзган.
Манбалар бу режа амалга ошмаса, Вашингтон Европа ва Форс кўрфази давлатлари ҳамкорларидан бўғозни очишда етакчи ролни ўз зиммаларига олишни талаб қилишини билдирган.
“Трамп ва унинг жамоаси Ҳўрмуз бўғози АҚШга қараганда Европа, Яқин Шарқ ва Осиё давлатлари учун анча муҳимроқ, деб ҳисоблайди. Сўнгги бир неча ҳафта давомида Вашингтондаги маъмурият вакиллари ҳамкор ва иттифоқчиларга бўғозни очиш бўйича музокараларга ёки операцияларга тайёр туришни сўраб мурожаат қилган”, дейилади хабарда.
