Яқин Шарқдаги можаролар араб давлатларига 200 млрд долларгача зарар етказиши мумкин — БМТ
Можаро оқибатида минтақада 3,6 миллионга яқин иш ўрни йўқолиши ва миллионлаб одамлар қашшоқликка тушиб қолиши мумкин.
БМТнинг ҳисоб-китобларига кўра, Яқин Шарқда юзага келган кескинлик араб давлатлари иқтисодиётига жиддий зарар етказиши мумкин. Таҳлилларга кўра, минтақа иқтисодиёти можаролар сабаб 120 миллиард доллардан 194 миллиард долларгача йўқотишларга дуч келиши эҳтимоли мавжуд.
Bloomberg хабарига кўра, БМТ Тараққиёт Дастури тадқиқотида АҚШ ва Исроилнинг Эронга қарши эҳтимолий ҳарбий ҳаракатлари минтақа иқтисодий ўсишига қарийб 200 миллиард долларгача зарба бериши мумкинлиги қайд этилган.
Ҳисобот муаллифлари можаролар қисқа муддат давом этса ҳам, уларнинг ижтимоий-иқтисодий оқибатлари кенг кўламли бўлиши мумкинлигини таъкидламоқда. Таҳлилларга кўра, Яқин Шарқдаги кескинлик араб давлатлари иқтисодиётида ўсиш суръатларини сезиларли даражада секинлаштириши мумкин.
Мутахассисларнинг баҳолашича, можаро оқибатида минтақада ишсизлик даражаси қарийб 4 фоизга ошиши мумкин. Бу эса тахминан 3,6 миллион иш ўрни қисқаришига ва 4 миллионга яқин аҳолининг қашшоқликка тушиб қолишига олиб келиши эҳтимоли бор.
Тадқиқотда энг катта иқтисодий йўқотишлар Форс кўрфази давлатлари ҳамда Левант (Баҳрайн, Қатар, Қувайт, БАА, Оман,Ливан) ҳудудида кузатилиши мумкинлиги қайд этилган. Ушбу ҳудудларда ялпи ички маҳсулот ҳажми 5 фоиздан ортиқ қисқариши мумкинлиги тахмин қилинмоқда.
Бундан ташқари, минтақадаги кескинлик глобал энергия бозорларига ҳам таъсир кўрсатмоқда. Ҳормуз бўғози орқали юк ташишдаги хавф ва чекловлар энергия ресурслари, озиқ-овқат ҳамда ўғит нархларининг ошишига олиб келиши мумкинлиги қайд этилган.
