Ўзбекистонда Экологик комиссиянинг ваколатлари бутун республика миқёсида кенгайтирилди
Комиссиянинг номи “Республика махсус комиссияси” деб ўзгартирилиб, фаолияти 2027 йил 1 мартга қадар узайтирилди.
Сўнгги пайтларда ҳаво тозалиги, чанг-тўзонлар ва экологик муаммолар жамиятнинг энг долзарб мавзуларига айланган. Тошкент шаҳрида бошланган экологик ташаббуслар энди фақат пойтахт билан чекланмай, бутун Ўзбекистон бўйлаб тизимли ва стратегик босқичга кўтарилмоқда.
Янги Фармонга мувофиқ, Тошкент шаҳрида экологик вазиятни яхшилаш бўйича кечиктириб бўлмайдиган чора-тадбирларни амалга ошириш мақсадида тузилган махсус комиссия фаолияти 2027 йил 1 мартга қадар узайтирилди.
Муҳим ўзгаришлардан бири комиссиянинг мақомида бўлиб, эндиликда у «Экологик вазиятни яхшилаш юзасидан кечиктириб бўлмайдиган чора-тадбирларни амалга ошириш бўйича Республика махсус комиссияси» деб аталади.
Бу шуни англатадики, ҳавони тозалаш, саноат фильтрлари ўрнатиш ва яшилликни кўпайтириш каби экологик вазифалар энди фақат Тошкент билан чекланмайди. Бутун мамлакатдаги экологик вазият Республика комиссиясининг қатъий назорати ва бошқаруви остида бўлади.
Давлат экологик инқирозларга вақтинчалик ёки локал ечим эмас, балки тизимли, узоқ муддатли ва бутун республика миқёсида стратегик ечим изламоқда. Шу тариқа, келгуси йилларда бутун юрт бўйлаб тоза ҳаво ва соғлом муҳит яратиш йўлида муҳим ва амалий ўзгаришлар кутилмоқда.
