Афғонистонда сув тошқинлари ва кўчкилар оқибатида 40 дан ортиқ киши ҳалок бўлди
Табиий офатлар сабаб 476 та уй шикастланган, 290 гектарга яқин қишлоқ хўжалиги ерлари зарар кўрган.
Афғонистон ҳудудида давом этаётган кучли ёғингарчиликлар оқибатида юзага келган сув тошқинлари ва кўчкилар натижасида камида 42 киши ҳалок бўлди, 66 киши жароҳат олди. Бу ҳақда Ariana News телеканали мамлакатнинг табиий офатларни бошқариш идораларига таяниб хабар берди.
Маълумотларга кўра, мамлакатда 25 мартдан буён давом этаётган кучли ёмғирлар оқибатида табиий офатлар юзага келиб, аҳоли яшаш ҳудудлари ва инфратузилмаларга жиддий зарар етказган.
Афғонистон Табиий офатларни бошқариш бошқармаси маълумотига кўра, табиий офатлар натижасида камида 476 та турар-жой биноси шикастланган, шунингдек, қарийб 290 гектар қишлоқ хўжалиги ерлари ювилиб кетган. Офатлар оқибатида жами 1140 та оила зарар кўрган.
Расмийларнинг таъкидлашича, қурбонларнинг аксарияти мамлакатнинг марказий ва шарқий ҳудудларида, жумладан Парвон, Майдан Вардак, Дайкунди вилоятларида қайд этилган. Айрим ҳудудларга кириш имконияти чекланганлиги сабабли қутқарув ишлари мураккаблашмоқда.
Мутасадди идоралар яқин кунларда ёғингарчилик яна давом этиши мумкинлигини билдириб, сув тошқинлари ва кўчкилар хавфи сақланиб қолаётганидан огоҳлантирди.
Шу билан бирга, қўшни Пoкистoннинг Хайбер Паҳтунхва вилоятида ҳам кучли ёғингарчиликлар оқибатида 17 киши ҳалок бўлган, 56 киши жароҳат олгани маълум қилинди.
