Ҳайдовчилар учун жарима баллари бўйича имтиёзлар борлиги айтилди
Ҳайдовчи 12 ой давомида умуман жарима баллари олмаса, кейинги биринчи қоидабузарлик учун жарима баллари қўлланилмайди.
Ҳайдовчиларга нисбатан қўлланиладиган жарима баллари тизимида қатор имтиёзлар борлиги айтилди.
Амалдаги тартибга кўра, агар ҳайдовчи охирги жарима баллини олганидан сўнг 6 ой давомида янги қоидабузарлик содир этмаса, унинг умумий жарима балларидан 2 балл чегириб ташланади. Агар мавжуд баллар сони 2 тадан кам бўлса, улар тўлиқ бекор қилинади ва жарима баллари ҳисобланиши янгидан бошланади.
Шунингдек, ҳайдовчи 12 ой давомида умуман жарима баллари олмаса, кейинги биринчи қоидабузарлик учун жарима баллари қўлланилмайди.
Агар қоидабузарлик бўйича нотўғри қарор қабул қилинган бўлса, у ваколатли органлар ёки суд томонидан бекор қилинади ва тегишли жарима баллари ҳам олиб ташланади.
Аввалроқ 1 апрелдан йўл қоидабузарликлари учун жарима баллари мавжуд автоматлаштирилган фото ва видео қайд этиш тизимлари орқали аниқланган ҳолатларда ҳам ҳисобланиши маълум қилинганди.
Унга кўра, йўл ҳаракати қоидаларини бузиш ҳолатлари эндиликда фақат Йўл ҳаракати хавфсизлиги (ЙҲХ) ходимлари томонидан эмас, балки йўлга ўрнатилган камера тизимлари орқали қайд этилган тақдирда ҳам жарима балларига таъсир қилади.
