АҚШ Гренландиядаги ҳарбий базаларга кириш бўйича Дания билан музокара олиб бормоқда

 

Пентагон Денмарк билан Гренландия ҳудудида жойлашган учта ҳарбий базага кириш ҳуқуқи бўйича музокаралар олиб бормоқда. Бу ҳақда The New York Times нашри хабар берди.

 

Маълум қилинишича, ушбу масала АҚШ Шимолий қўмондонлиги раҳбари Грегорй М. Гуиллот томонидан АҚШ Конгрессида ўтказилган эшитувлар чоғида тилга олинган. Унинг сўзларига кўра, АҚШ ҳарбийлари Гренландия ҳудудидаги турли ҳарбий объектларга кириш имкониятларини кенгайтиришдан манфаатдор.

 

Хусусан, музокаралар Гренландиянинг жанубида жойлашган Нарсарсуақ ҳамда оролнинг жануби-ғарбий қисмидаги Кангерлуссуақ ҳудудларини ҳам қамраб олади. Ушбу объектлардан АҚШ ҳарбийлари илгари фойдаланган бўлиб, америкаликлар 1950 йилларда Нарсарсуақдан, 1990 йилларда эса Кангерлуссуақдан чиқиб кетган.

 

Нашрнинг ёзишича, ушбу базалардаги ҳарбий инфратузилманинг катта қисми демонтаж қилинган бўлсада, мазкур ҳудудларда кичик аэропортлар фаолиятини давом эттирмоқда. Ҳозирча Гренландияда жойлаштирилиши мумкин бўлган АҚШ ҳарбий хизматчилари сони ҳақида расмий маълумот берилмаган.

 

Музокаралар 1951 йилдаги АҚШ ва Дания ўртасидаги келишувларга асосланмоқда. Айни пайтда Гренландия ҳудудида битта АҚШ ҳарбий базаси фаолият юритмоқда.

 

Аввалроқ Доналд Трамп Гренландия АҚШ миллий хавфсизлиги нуқтайи назаридан муҳим ҳудуд эканини таъкидлаб, орол Қўшма Штатлар таркибига қўшилиши кераклиги ҳақида бир неча бор фикр билдирган эди. У ушбу масалани Марк Рутте билан ҳам муҳокама қилгани маълум қилинган.